Японы Кагошима мужийн Токара арлын гинжин хэлхээнд зургадугаар сарын 21-нээс хойш газар хөдлөлтийн чичиргээ 1700 даваад байна. Тодруулбал, Лхагва гаригийн 04:00 цагийн байдлаар 1713 удаагийн чичиргээ бүртгэгджээ.

Нөхцөл байдал тодорхойгүй, түгшүүртэй байгаа тул долдугаар сарын 4-ний өдрөөс Токара арлуудыг захирдаг засаг захиргааны нэгж болох Тошима тосгоны оршин суугчдыг нүүлгэн шилжүүлж эхэлсэн билээ. Кагошима мужийн бүрэлдэхүүнд Токара арлууд тэргүүтэй маш олон арал байдаг. Харин Тошима нь 160 км орчим үргэлжилдэг бөгөөд "Японы хамгийн урт тосгон" гэгддэг.

Тус бүс нутагт 2021, 2023 онд хэд хэдэн удаа газар хөдлөлт болсон ч энэ удаад хамгийн ойр давтамжтайгаар чичиргээ бүртгэгдэж байна. Тодруулбал, 2023 оны есдүгээр сард нэг ба түүнээс дээш шатлалын 346 чичиргээ 15 хоногийн турш үргэлжилжээ. Мөн 2021 оны арванхоёрдугаар сард 26 өдрийн турш 308 чичиргээ мэдрэгдэж байв.