FIBA 3×3 буюу Олон улсын 3х3 сагсан бөмбөгийн холбооны зүгээс ирэх 2027 оны Азийн аваргыг Монгол Улсын нийслэл Улаанбаатар хотноо зохион байгуулна гэдгээ мэдэгдлээ. Тэмцээн 2027 оны гуравдугаар сарын 31-нээс дөрөвдүгээр сарын 4-ний өдрүүдэд болох тов гарчээ.

Өнгөрсөн сард 3х3 сагсан бөмбөгийн дэлхийн аваргыг зохион байгуулсан Монгол Улсад хоёр дахь удаагаа Азийн аварга болох гэж байна. Өмнө нь 2017 онд Улаанбаатар хотноо болоход Монгол Улсын эрэгтэй шигшээ баг Шинэ Зеландыг хожиж, анхны түрүүгээ хүртэж байсан билээ.

FIBA 3×3 сагсан бөмбөгийн гүйцэтгэх захирал Алекс Санчез ярихдаа "Монгол 3х3 сагсан бөмбөгийн жинхэнэ дэлхийн хэмжээний улс гэдгээ баталсаар байна. Фэнүүд, уур амьсгал, талбай дээрх чанар нь Монголыг ирэх жилийн 3х3 сагсан бөмбөгийн Азийн аваргыг хүлээх нөхцлийг бүрдүүлж байна" гэжээ.