Бангладеш улсад өнгөрсөн жил оюутнуудын тэргүүлсэн эсэргүүцлийн жагсаал гарах үед жагсагчдын эсрэг үхлийн аюултай зэвсэг хэрэглэх зөвшөөрлийг ерөнхий сайд Шейх Хасина өгсөн нь тогтоогджээ. Түүний утасны дуудлагын бичлэг задарсан нь хүн төрөлхтний эсрэг гэмт хэргийн тусгай шүүхэд чухал нотлох баримт болж байна. НҮБ-ын мэдээлснээр тухайн үед эмх замбараагүй байдлын улмаас 1400 орчим хүн нас баржээ.

Гэвч Энэтхэг рүү дүрвэсэн Шейх Хасина түүнд тулгасан бүх буруутгалыг няцааж байна.

1971 оны тусгаар тогтнолын дайнд оролцсон хүмүүсийн төрөл төрөгсдөд төрийн албаны ажлын байрны квот олгохыг эсэргүүцэн уг жагсаал анх эхэлж байжээ. Улмаар 15 жил төрийн эрх барьсан Хасинаг түлхэн унагасан олон нийтийн хөдөлгөөн болж хувирсан юм.

Шейх Хасина уг тушаалаа өнгөрсөн оны долдугаар сарын 18-нд өгсөн байдаг. Дуудлагын дараах хэдэн өдрийн турш цэргийн зориулалттай винтовуудыг нийслэл хотын хаа сайгүй байршуулж, ашиглажээ.

Эсэргүүцлийн жагсаалаас хойш Шейх Хасинагийн утасны дуудлага гэх олон тооны бичлэг задарсан. Гэвч тэдгээрийн ихэнх нь албан ёсоор нотлогдож батлагдаагүй байна. Долдугаар сарын 18-ны дуудлагын тухайд дуу хоолойг засварлаж, өөрчилсөн байх магадлал маш бага гэдгийг шүүх эмнэлэг тогтоожээ.