Хоёр Солонгосын хилийн бүсэд, Өмнөдийн Кёнги мужид нээгдсэн Старбаксын салбар гадаад, дотоодын жуулдчын хөлд дарагдаж байна. Учир нь тус салбараар Хойд Солонгосын ховор үзэмжийг тольдох боломжтой юм. Кёнги мужийн Гимпо дахь "Aegibong Peace Ecopark" ажиглалтын төвийн оройд тус кафе байрладаг. Үйлчлүүлэгчид панорама цонхоор ойролцоогоор 1.4 км хүртэлх зайг харах боломжтой.

Тус байрлал нь хоёр Солонгос хоорондын цэрэггүй бүс тул жуулчид аюулгүй байдлын шалган нэвтрүүлэх цэгээр дамжин өнгөрдөг. Мөн тодорхой цагийн хуваарийн дагуу цахим захиалга хийж байж үйлчлүүлэх юм уу, урьдчилан тасалбар худалдаж авах ёстой.

Өнгөрсөн оны арваннэгдүгээр сарын 29-нд нээгдсэн тус кафе ердөө долоохон сарын дотор 123 мянга гаруй үйлчлүүлэгч хүлээн авчээ. Эндээс тооцоолоод үзвэл өдөрт дунджаар 600 гаруй зочин хүлээн авсан гэсэн үг. Амралтын өдрүүдэд энэ ачаалал бараг хоёр дахин нэмэгдэж, 1000 дөхдөг.

"Aegibong Peace Ecopark" нь өглөөний 09:00 цагаас оройн 17:30 цаг хүртэл нээлттэй. Иймд Старбаксын кафе бусад салбараас богино цагаар буюу 10:00-16:30 цагийн хооронд ажилладаг.

"Даяанч хаант улс руу харангаа кофе ууж болох газар" гэж тус кафег тодорхойлжээ. Энэ боломжийг алдахыг хүсээгүй жуулчид Гимпог зорих болсноор цэцэрлэгт хүрээлэнгийн үйлчлүүлэгчдийн тоо ч ихэссэн. Тухайлбал, энэ оны эхний дөрвөн сард "Aegibong Peace Ecopark"-ыг 129 мянган хүн үзэж сонирхжээ. Гэтэл өнгөрсөн жил бүтэн 12 сарын хугацаанд 190 мянган хүн тус паркаар зочилсон байдаг.