Жил бүрийн долдугаар сард Засгийн газраас Монголын эдийн засгийн форумыг зохион байгуулдаг. Энэ удаагийн форумд 1600 гаруй хүн оролцож байна. Тэдний гол анхаарлын төв нь шинэ Ерөнхий сайдын байр суурь болон шинэ Засгийн газраас хэрэгжүүлэх бодлого. Тиймээс Ерөнхий сайд Г.Занданшатарын өгөх мессеж дээр хувийнхан голлон фокуслах нь ойлгомжтой.

Гадаад талдаа экспортын хязгаарлалт үүссэн, дотоод талдаа эрчим хүчний хомсдол нүүрлэсэн нь Монголын эдийн засагт хүнд сорилт болох нь гарцаагүй. Мэдээж, хямралаас гарахад гадаад, дотоодын хувийн хэвшлийнхний дэмжлэг нэн чухал болсон.

Учир нь, нүүрсний үнэ дээр дулдуйдах боломж шинэ засагт байхгүй. Хоёрт, хувийн хэвшлээ гудамжны шантаажчидтай хамтран дарамтлаж дээрэмдвэл улс орон нохойн замаар ордгийг Л.Оюун-Эрдэнийн Засгийн газар хангалттай харууллаа.

Тиймээс Г.Занданшатарт улс төр хийхээс илүү улс орноо дампууралд хөтлөчихгүйгээр хямралаас “хямдхан” гарах арга зам хэрэгтэй. Тэрхүү бодлогоо нээлттэй, ил тод зарлаж, хэлсэн, амалсандаа хүрдэг байх төлөвшил Монголын төрд нэн чухал болсон.

Ерөнхий сайд Г.Занданшатарын зүгээс Монголын шинэ Засгийн газар ямар бодлого хэрэгжүүлэхээр төлөвлөж байгаагаа “CNN” телевизээр дамжуулан дэлхийн хөрөнгө оруулагчдын чихэнд хүргэхээр шийджээ.

Тэрбээр “CNN” телевизэд өгсөн ярилцлагадаа хэд хэдэн онцлох мессеж өгсний дотор хамгийн чухал нь “Урьж авчраад хөөдөг, залж авчраад заамддаг” байж болохгүй гэх үг. Үнэндээ , өнгөрсөн жилүүдэд Монгол Улс гадаадын хөрөнгө оруулагчдад хатуу, халтай хандаж ирсэн. Ганц гадаадын хөрөнгө оруулагчид ч биш дотоодын хөрөнгө оруулагчдаа хууль хүчнийхнийг ашиглан ил цагаан дээрэмдэх, үйл ажиллагааг нь зогсоох явдал утгаа алдсан.  Монголын хамгийн том татвар төлөгч, баялаг бүтээгчдээ муу нэртэй, луу данстай болгосон. Х.Баттулгын үед АН-ын лидер болгоныг бүтэн нэр, бүлээн зүсгүй болгосон херопаганда улс төрөөс эдийн засаг руу орж ирсэн.

Ямар олигтой Засгийн газар байсандаа “Баялгийн сан”-г Ж.Батзанданд хариуцуулж, хувийн хэвшлийнхэнтэй хэлэлцээрийн ширээний ард суух  БЭТ-өө болгох билээ. Үндсэндээ, өмнөх Засгийн газарт хувийн хэвшлийнхэнтэй хэлэлцээ хийх сонирхол байсан уу гэдэг ч өөрөө эргэлзээтэй асуултын тэмдэг. Ж.Батзанданг ердөө нохойд барьдаг, мод болгох гэсэн адийн төлөвлөгөөтэй байсныг ч хэн мэдэх вэ.

Ямар ч байсан Ерөнхий сайд Н.Занданшатар хөрөнгө оруулагчдад хандан эрчим хүчний салбарт хөрөнгө оруулах урилга илгээсэн. Монгол Улс нь сэргээгдэх эрчим хүчний асар их нөөцтэй. Ялангуяа жилийн дөрвөн улирлын турш салхилж байдаг нь манай орны нэг давуу тал. Тиймээс дайсан тодруулдаг дайсагнасан бодлогоо больчихвол Монголд хөрөнгө оруулах сонирхол гадаад зах зээлд өснө. Дотоодынхон төр засгийн дарамт, хавчлагаас болж  зугатах дээрээ тулахгүй.

Ерөнхий сайдын өгсөн удаах мессеж бол иргэдээ сонсоно, бодлого хувийн хэвшлийнхэнтэйгөө зөвлөлдөнө гэж. Зөв, хувийн хэвшээл дарамталдаг биш хувийн хэвшлээ дэмжих замаар асуудлаа шийддэг байх ёстой. МҮХАТ-ын дарга Б.Лхагважав болсон. Ямар ч бнйсан буруу үг үйлдэл гаргахгүй. Өнгөрсөн хугацаанд Л.Оюун-Эрдэнийг хамгийн чангаар шүүмжилсэн хүн.

Түүнчлэн нэкстийн нэг амлалт нь эдийн засгаа төрөлжүүлнэ гэж. Гэхдээ Монголын үе, үеийн Засгийн газар ингэж ярьсаар ирсэн, амалсаар ирсэн. Атал юу ч өөрчлөгдөөгүй. Гээд Монголын эдийн засгийн тэргүүлэх бүтээгдэхүүн уул уурхай, газрын ховор элемент байх боловч хөдөө аж ахуй, сэргээгдэх эрчим хүч манай засгийн газрын дараагийн том зорилтууд байх болно гэж харж, тодорхойлж буй нь нэг том алхам юм.

“CNN”-д ярилцлага өгөхдөө Ерөнхий сайдын өгсөн хамгийн чухал онцлох мессеж нь “Засгийн хувийн хэвшилтэй хамтарч, хувийн хэвшлээ дэмжиж ажиллах бодлого барина. Татварын цогц шинэчлэлийн ажлын хэсэг байгуулсан ажиллаж байна. Намар гэхэд татварын хуулиа чуулганаар хэлэлцүүлнэ. Мөн худалдаа аж үйлдвэрийн танхимын тухай хуулиар дамжуулж төрийн зөвшөөрлүүдээ танхимд шилжүүлж хүнд суртлыг арилгана. Хөрөнгө оруулалтын хуулиа шинэчилж, хөрөнгө оруулагчдаа хамгаалж, ээлтэй, тогтвортой хууль эрх зүйн орчин бүрдүүлнэ” гэх байр суурь.

Хамгийн гол нь эдгээр байр сууриндаа багт зогсоорой гэж Ерөнхий сайдад захимаар байна.

Б.БАТ