Монгол Улсын Ерөнхийлөгч У.Хүрэлсүх зарлиг гарган, сагсан бөмбөгийн шилдэг тамирчин Т.Санчирт гавьяат тамирчин цол хүртээхээр болжээ. Монголын сагсан бөмбөгийн ертөнцийн нэг үеийн тод од, бүх цаг үеийн хэмжээнд яригдах домог болох Т.Санчир ийнхүү хөдөлмөрөө үнэлүүлж, төрдөө үнсүүлж байна. Түүний цол тэмдгийг өнөөдөр/2025.07.07/ гардуулах аж.

Т.Санчир бол яахын аргагүй дээрх шагналыг хүртэх эрхтэй хүн. Түүний тоглолтыг шимтэн үзэж, сагсан бөмбөгт дурласан, хорхойссон, хичээллэсэн залуусын тоо мянгаар тогтохгүй. Талбай дээр ч Т.Санчир үлгэр жишээ тоглогч, тэмцэгч, ялагч нэгэн. Дээд лигийн аваргаас эхлээд Азийн наадам, дэлхийн универсиадын шилдэг оноо түүгч, Азийн лигт тоглосон Монголын анхны легионер гээд түүнийг тодорхойлох үгс мундахгүй.

Т.Санчир, Б.Билгүүн гэж холбоо үгс мэт яригддаг эдгээр шилдгүүд энэ жил гавьяат тамирчин боллоо. Үндэсний бөхөөр бол "Хоёр Мөнх", "Хоёр Эрдэнэ" мэтээр зүйрлэх эрхмүүд. Спорт сонирхдоггүй хүн бол нэг хүн гэж эндүүрмээр олон жил чихэнд хоногшжээ. Тэд хамтдаа Монгол төдийгүй Азийн сагсан бөмбөгт өөрсдийн нэр алдар, ул мөрийг үлдээж, цэнхэр тивийн цээжин дээр сагсан бөмбөг тоглодог ард түмэн байдгийг харуулсан.

Хамтдаа лигийн аварга болсноос эхлээд аваргын төлөө өрсөлдөгчийн дүрээр тулж, хамгийн гол эх орныхоо нэрийг олон улсын тавцанд хамтдаа хамгаалж, дархалсан билээ. Б.Билгүүн ч гавьяат тамирчин хүртэх үеэрээ Т.Санчир найзыгаа удахгүй энэ цолыг аваасай гэж хүсч байсан юм. Тэр нь ч биеллээ.

Энэ жил Монголын сагсан бөмбөг амжилт, бүтээлээр дүүрэн түүнийгээ дагаад ч шагналын хур бууж байна. Б.Билгүүн гавьяат тамирчин болсноос хойш саяхан 3х3 сагсан бөмбөгийн эмэгтэй шигшээ багийн тамирчид, дэлхийн аваргаас мөнгөн медаль хүртсэн амжилтаараа мөн гавьяат тамирчин болсон билээ.

Дашрамд дурдахад, Т.Санчирын өвөө Монгол Улсын дархан аварга Д.Дамдин агсны тухайд Хөдөлмөрийн баатар, гавьяат жүжигчин цол хүртсэн түүхтэй. Ийнхүү өвөө, ач хүү хоёр хамтдаа гавьяат болж, ховор тохиох түүхийн эзэд болж байна.