Нийслэлийн иргэдийн төлөөлөгчдийн хурлын төлөөлөгч/НИТХ/, Төв цэнгэлдэх хүрээлэнгийн гүйцэтгэх захирал асан Ж.Энхжаргалан, Ардчилсан намын гишүүн Д.Мөнх-Эрдэнэ нарт холбогдох зөрчлийн хэргийн Давж заалдах шатны шүүх хурал өнгөрсөн зургадугаар сард болж, анхны шатны тойргийн шүүхийн шийдвэрийг хэвээр үлдээснээр 10 цагийн хугацаагаар албадан сургалтад хамруулж, ес хоногийн хугацаагаар баривчлах шийтгэл оногдуулсан юм.

Шүүхийн шийдвэрийн дагуу тэднийг Шүүхийн шийдвэр гүйцэтгэлийн ерөнхий газрын харьяа Баривчлах төвд саатуулсан байсан бөгөөд  хоног нь дууссанаар НИТХ-ын төлөөлөгч Ж.Энхжаргалан өчигдөр/2025.07.04/ Ардчилсан намын гишүүн Д.Мөнх-Эрдэнэ уржигдар /2025.07.03/ суллагджээ.

НИТХ-ын төлөөлөгч Ж.Энхжаргалан ес хоногийн албадан сургалтад хамрагдсан талаараа “Алдаж оносон олон эрчүүдтэй хамт ес хоног хоол цайгаа хувааж ууж, Баривчлах төвийн алба хаагчдын тавьсан шаардлагыг биелүүлж, дотоод журамд нь заасан хөтөлбөрийн дагуу хэд хэдэн сургалтуудад хамрагдлаа. Баривчлах төвд 7-30 хоногийн зөрүүтэй хөгшин залуу янз бүрийн л эрчүүд байна. Ихэнхийг нь согтуугаар тээврийн хэрэгсэл барьсан, эсвэл гэр бүлийн маргаанаас үүдсэн асуудалтай хүмүүс эзэлдэг юм байна. Ухаарах нь ухаарч, гомдох нь гомдож янз бүрийн сэтгэл зүйтэй хүмүүс тэнд байна. ШШГЕГ-ын харьяа баривчлах төвийн хамт олны хэрэгжүүлдэг, иргэдэд зориулсан тодорхой цөөн тооны албадан сургалт нь хүмүүст бага ч болов үр дүнгээ өгч, нөлөөлж байх шиг мэдрэгдсэн" гэсэн юм.

Г.ХОРОЛ