"R&B" дуучин Экон Сенегал улсад футуристик хот байгуулахаар төлөвлөж байсан ч бүтэлгүйтжээ. Үүнийхээ оронд Экон илүү бодит төсөл дээр ажиллах болно. Тэрбээр Сенегалын аялал жуулчлалын хөгжлийн байгууллага "Сапко"-той хамтран ажиллахаар төлөвлөсөн байжээ. "Сапко" компани түүний шинэ төслийг ч бас дэмжин ажиллана гэдгээ мэдэгдээд байна.

АНУ-д төрсөн ч Сенегалд өссөн Экон 2018 онд хоёр ч амбицтай төсөл эхлүүлж буйгаа зарласан юм. Үүний эхнийх нь "Экон хот" бөгөөд зургаан тэрбум ам.долларын өртөгтэй байжээ.

"Экон хот" төсөл таван жил өнгөрсөн ч нүдэнд харагдах ахиц дэвшилгүй байна. Сенегалын нийслэл Дакараас өмнө зүгт 100 км зайд орших 800 га талбайд тус хотыг төлөвлөсөн байжээ. Гэвч одоо хэр нь тус талбай ихэнх хэсэгтээ хоосон хэвээр байна. Зам, орон сууц, цахилгаан тэнд байхгүй.

Анх гаргасан төлөвлөгөө ёсоор бол 2023 оны эцэс гэхэд тус хот эмнэлэг, худалдааны төв, сургууль, цагдаагийн газар, хог хаягдлын төв, нарны цахилгаан станцтай болчихсон байх ёстой байжээ. Өндөр технологид түшиглэсэн байгальд ээлтэй "Экон хот" бүхэлдээ сэргээгдэх эрчим хүчээр ажиллах ёстой байв.

Экон 2022 онд ярилцлага өгөхдөө "Төслийн явц 100 мянган хувьтай байна" гэж байсан ч үгүй бололтой.

Харин түүний хоёр дахь төсөл нь "Akoin" нэртэй криптовалют юм. "Akoin" криптовалют нь олон жилийн турш хөрөнгө оруулагчдынхаа эргэн төлөлтийг арай ядан хийж байжээ. Экон энэ талаар мэдэгдэл хийхдээ "Би хангалттай удирдан зохион байгуулж чадаагүй. Үүнийхээ хариуцлагыг бүрэн хүлээнэ" гэсэн юм.