УИХ-ын чуулганы өнөөдрийн /2025.07.04/ хуралдаанаар Монгол Улсын 2025 оны төсвийн тодотголын гурав дахь хэлэлцүүлгийг хийх үеэр Боловсролын сайдын багц дахь 2.6 тэрбум төгрөгийг  хасаж, Цахим хөгжил инноваци харилцаа холбооны сайдын багц руу шилжүүлснээр нийслэлийн 117 багшийг тэтгэмжгүй болгоод байна.

Учир нь, энэ жил 117 багш тэтгэвэртээ гарч байгаа бөгөөд 36 сарын цалинтай тэнцэх нэг удаагийн тэтгэлэг авах ёстой.  Гэтэл хуульд заасан энэхүү тэтгэлгийнх нь мөнгийг сайд Э.Батшугарын багцад шилжүүлснээр дээрх багш нар тэтгэмжгүй болоод байна.

Төсвийн тодотгол гуравдугаар хэлэлцүүлгийг давсан тул санал хурааж, өөрчлөх боломжгүй болсон.

Багш нарыг тэтгэмжгүй болгосон энэ үйл явдлыг УИХ-ын дэд дарга Б.Пүрэвдорж “Ардын намын сайд нар л нэгнийхээ төсвийг нөгөө рүү шилжүүлсэн байна лээ шүү” гэж мэдэгдсэн юм.

Харин Цахим хөгжил инноваци харилцаа холбооны сайд Э.Батшугар "Надад хэлэхгүйгээр 2.6 тэрбум төгрөгийг сайдын багц руу шилжүүлсэн байна лээ. Би яагаад ингэснийг ойлгоогүй.

Ганбаатар гишүүн санал гаргахад Төсвийн байнгын хороо дэмжээгүй гэсэн, гэтэл УИХ-ын чуулган дээр санал хураахад дэмжиж босгосон. Миний хувьд юу болсныг мэдээгүй" гэдэг тайлбар хийгээд буй.

Боловсролын сайдыг бөөрөлхөх гээд төсвөөс нь танасан Ардын намынхны зарчимгүй үйлдэл нь эргээд цаг наргүй, өндөр ачаалалтай ажилладаг багш нарыг тэтгэмжгүй болгож хохироосонд олон нийт бухимдаж байна.

Хэдхэн хоногийн өмнө УИХ дахь МАН-ын бүлэг 2025 оны төсвийн тодотголыг дагаж өргөн баригдсан Төрийн албаны тухай хуульд өөрчлөлт оруулах тухай хуулийн төслийг Засгийн газар буцаан татаж авахыг мэдэгдсэн байдаг. Учир нь, дээрх хуулийн зохицуулалтаар төрийн албан хаагчдын цалингийн нэмэгдэл, тэтгэвэр тэтгэмжийг нь бууруулах заалт орж ирснийг дэмжих боломжгүй гэж мэдэгдсэн ч хэлсэн үгэндээ хүрсэнгүй.

Г.ХОРОЛ