2024 онд дэлхийн зах зээл дээр алтны ханш түүхэн дээд түвшинд хүрч, унц тутамд 3,100 ам.доллар давсан нь Төв банкнуудын худалдан авалт нэмэгдсэнтэй холбоотой. Геополитикийн хурцадмал байдал, худалдааны маргаан, ам.долларын өгөөж буурах хүлээлт зэрэг нь алтны үнэ тогтмол өсөх суурь нөхцөл болж байна. Судлаачдын үзэж буйгаар алтны үнэ ойрын хугацаанд өндөр түвшинд хадгалагдах төлөвтэй.

Монгол Улсын хувьд энэ боломжийг эдийн засгийн үр ашиг болгон хувиргах нөөц бий. Сүүлийн жилүүдэд Монголбанк жилд дунджаар 20 орчим тонн үнэт металл худалдан авч, 900 сая ам.долларын орлого бүрдүүлж байна. Гэвч шороон ордын нөөц багасаж, олборлолт буурч байгаа тул өндөр ханшийн үед алтны нийлүүлэлтээ нэмэгдүүлэх бодлогын дэмжлэг зайлшгүй хэрэгтэй байна.

Өмнөх “Алт-2” аяны хүрээнд Монголбанк 2020-2022 онд нийт 67.3 тонн үнэт металл худалдан авч, олборлогчдод 505 тэрбум төгрөгийн хөнгөлөлттэй зээл олгож байлаа. Тиймээс үүний үргэлжлэл болох “Алт-3” аяныг яаралтай хэрэгжүүлэх нь экспортын орлогыг нэмэгдүүлэх, Монголбанкны гадаад валютын нөөцийг өсгөх, эдийн засгийн тогтвортой байдлыг хангахад онцгой ач холбогдолтой байна.

Засгийн газар, Монголбанк, хувийн хэвшил хамтран алтны салбарыг хууль, санхүү, татварын зохицуулалтаар дэмжих замаар үнэ өссөн энэ үед олборлолтыг богино хугацаанд нэмэгдүүлэх бодит боломж бүрдэж байна.

Алтны үнэ өсөж, дэлхий нөөцөө арвижуулж буй энэ цаг үед Монгол олборлолтоо нэмэгдүүлж, эдийн засгаа өсгөх боломжоо алдах учиргүй.