Японы Токара арлын гинжин хэлхээнд зургадугаар сарын 21-нээс хойш газар хөдлөлтийн чичиргээ 1000 гаруй удаа бүртгэгдээд буй. Тэгвэл Пүрэв гаригийн 16:13 цагийн орчимд Кагошима мужид 5.5 магнитудын хүчтэй газар хөдөллөө. Цаг уурын албаны мэдээлснээр газар хөдлөлтийн голомт нь Токара арлуудын ойролцоо Тошима тосгонд байжээ. Газар хөдлөлт 20 орчим км гүнд болсон бөгөөд цунамийн аюул нүүрлээгүй.

1919 оноос Япон улс газар хөдлөлтийн чичирхийллийг бүртгэж эхэлсэн. Тэр үеэс хойш Тошима тосгонд анх удаа ийм хүчтэй газар хөдөлжээ.

Нөхцөл байдал тодорхойгүй, түгшүүртэй байгаа тул Тошима тосгоны оршин суугчдыг нүүлгэн шилжүүлж эхэлжээ. Өнөө өглөө оршин суугчдыг усан онгоцоор Кагошимагийн боомт руу хүргэж байна. Нүүлгэн шилжүүлэх ажил долоон өдөр үргэлжлэх аж. Ойролцоох бусад арлын оршин суугчдыг ч нүүлгэн шилжүүлж магадгүй байна.

Дашрамд дурдахад, Кагошима мужийн бүрэлдэхүүнд Токара арлууд тэргүүтэй маш олон арал байдаг. Токара арлуудыг захирдаг засаг захиргааны нэгж нь Тошима тосгон юм. Тошима нь 160 км орчим үргэлжилдэг бөгөөд "Японы хамгийн урт тосгон" гэгддэг.