Монголбанкны Мөнгөний бодлогын зөвлөл зургадугаар сард хуралдаад тэтгэврийн зээлд тавьж байсан өр, орлогын харьцааг 50:50 болгосон ч ахмад настнууд дахин зөөлрүүлэх шаардлага тавьж буй. Иймээс ирэх долоо хоногийн Даваа гариг буюу долдугаар сарын 7-нд Монголбанкны Мөнгөний бодлогын зөвлөл дахин хуралдаж тэтгэвэр барьцаалсан зээлийн асуудлыг хэлэлцэхээр болжээ.

Энэ талаар Төв банкны ерөнхийлөгч Б.Лхагвасүрэн “Тэтгэврийн зээлд тавьсан 50:50 өр, орлогын харьцаа бол хэрэглээний зээл дээр тавигдаж байгаа стандарт. 2024 оноос хэрэгжиж байгаа стандарт юм. Тэтгэврийн зээлд тавьсан 50:50 өр, орлогын харьцаа хатуу байна гэж үзэж буй бол банк өөрөө шийдвэрээ гаргаж болох юм. Тэтгэврийн зээлийг хэрэглээний зээлийн ангиллаас гаргая гэдэг байдлаар асуудлыг шийдвэрлэж болох юм. Ирэх Даваа гаригт Монголбанкны Мөнгөний бодлогын зөвлөл хуралдана. Ерөнхий сайд болон Гэр бүл хөдөлмөр нийгмийн хамгааллын сайд нартай өнөөдөр /2025.07.03/ уулзсан . Ерөнхий сайдын зүгээс ахмадуудын тавьж байгаа тэтгэврийн зээлтэй холбоотой асуудлыг судал гэсэн” гэлээ.

Одоо үйлчилж байгаа шаардлагаар тэтгэврийн зээлд тавьсан өр, орлогын харьцаа 50:50 нөхцөлд ахмад настан тэтгэврээ барьцаалж зээл авахад тэтгэврийнхээ 50 хувийг зээлд, 50 хувийг нь амьжиргаагаа залгуулах эх үүсвэр болгож гар дээр нь үлдэх болж буй. Бага тэтгэвэр буюу сард 650 мянган төгрөгийн тэтгэвэр авдаг ахмад настны хувьд өмнө нь тэтгэвэр барьцаалсан зээл аваагүй тохиолдолд 4.5 сая төгрөгийн зээл авах боломж бий болсон. Энэ нь өмнө гаргасан журмаас зөөлөрсөн буюу 2.2 сая төгрөгийн тэтгэврийн зээл олддог байсантай харьцуулахад хоёр дахин өссөн үзүүлэлт гэж Төв банкны дэд ерөнхийлөгч мэдэгдсэн. Харин ахмадууд “50:50 харьцааг зөөлрүүлэхгүй бол өмнө нь тэтгэврээ барьцаалж зээл авсан ахмадуудын хувьд нэмж зээл авах боломж олдохгүй байна. Мөн бизнес эрхэлье гэхэд өндөр зээл авах шаардлага үүсдэг. Иймээс тэтгэврээ 100 хувь, болохгүй бол 70 хувь хүртэл барьцаалж гурван жилээр зээл авах шаардлага байгаа” гэдэг асуудлыг тавьж буй юм.

Г.ХОРОЛ