Хойд Солонгос улс Украин руу өмнөхөөсөө гурав дахин олон цэрэг илгээхээр төлөвлөж буйг тагнуулын мэдээллээр илрүүлжээ. Нэмэлтээр 25-30 мянга орчим цэрэг ирэх саруудад Украинд тулалдахаар Оросыг зорьж магадгүй байна. Өнгөрсөн оны арваннэгдүгээр сард илгээсэн 11 мянга орчим цэргийн 4000 нь нас барж, шархадсан гэж үзэж байна.

Эргэн сануулахад, Хойд Солонгос улс өнгөрсөн онд 11 мянган цэрэг илгээсэн гэдгийг талууд энэ дөрөвдүгээр сард л албан ёсоор баталсан билээ.

Украины батлан ​​хамгаалахын тагнуулын агентлагаас гаргасан мэдээлэлд дурдсанаар Оросын цэргийн нисэх онгоцыг боловсон хүчнийг тээвэрлэхэд зориулан бэлдэж байгаа шинж тэмдэг илэрчээ. Хойд Солонгосын Сунан нисэх онгоцны буудалд зургадугаар сарын 4-ний өдөр Ил-76 байх магадлалтай онгоцнуудыг мөн байршуулжээ. Нисэх онгоцоор тогтохгүй тавдугаар сарын 18-нд Дунай боомт дээр цэрэг тээвэрлэдэг Ропуча хөлөг онгоцыг байрлуулаад байна. Эдгээр мэдээлэл нь хойд солонгос цэргүүдийг өмнө нь тээвэрлэж байсан маршрут идэвхтэй байгаагийн илрэл юм.

Түүнчлэн Оросын генералууд Хойд Солонгост цэргийн сургуулилалт хийж байгаа гэсэн цуу яриа ч сүүлийн өдрүүдэд гараад байна.

Гэхдээ цэргийн шинжээчид 30 мянга гэдэг тоог хэтэрхий их гэж үзэж байна. Боломжит хувилбар нь 10-20 мянган цэрэг ажээ. Эсвэл Хойд Солонгос улс цэргүүдээ нэг дор биш үе шаттайгаар байршуулж магадгүй юм.