Улсын хэмжээнд сүүлийн таван жилд бүртгэгдсэн усны ослын тохиолдлоор амь насаа алдсан иргэдийн 69 хувь нь зуны улиралд, 41 хувь нь зөвхөн долдугаар сард амь насаа алдсан гэх ноцтой тоон үзүүлэлт гарчээ.

Мэргэжлийн байгууллагуудын мэдээлснээр, усны ослын тохиолдлуудын 26 хувь нь Туул голд, 11 хувь нь Хэрлэн голд, таван хувь нь Орхон голд бүртгэгдсэн байна. Мөн 12 гол, хоёр нуур болон тогтоол ус, хиймэл нууранд жилд хоёр болон түүнээс дээш удаа усны осол гардаг бол, нэр бүхий 107 голд жил бүр дор хаяж нэг удаа усны осол бүртгэгддэг байна.

Усанд осолдсон шалтгаан нөхцөлийг судлахад:

• Хийлдэг гудас, тоглоомоор хөвж тоглож байгаад осолдох
• Бага насны хүүхдүүдийг хараа хяналтгүй орхих зэрэг шалтгаанууд зонхилж байгаа бөгөөд энэ нь эцэг, эх, асран хамгаалагчдын хариуцлагагүй байдлаас шалтгаалж буйг мэргэжилтнүүд онцолж байна.

Энэ оны зургадугаар  сарын 30-ны байдлаар усны ослын 39 тохиолдол бүртгэгдэж, 23 хүн амь насаа алджээ. Үүнээс 16 нь насанд хүрэгч, долоо нь хүүхэд байна.

Холбогдох байгууллагууд иргэд, аялагчдад дараах анхааруулгыг хүргэж байна:

• Бага насны хүүхдийг гол, нуурын ойролцоо хяналтгүй орхихгүй байх
• Согтууруулах ундаа хэрэглэсэн үедээ усанд орохгүй байх
• Хийлдэг тоглоом, гудас ашиглан гол, нуурын усанд орохгүй байх
• Аялал зугаалгаар явахдаа аюулгүй байдлаа хангаж, үүсэж болзошгүй эрсдэлээс сэргийлэх

С.УЧРАЛ