Улаанбаатар хотноо болж өнгөрсөн FIBA 3×3 сагсан бөмбөгийн дэлхийн аваргаас мөнгөн медаль хүртсэн Монголын шигшээ багийн гол тоглогч Н.Нандинхүсэлийн мөрөөдөл биеллээ. Түүний хувьд News.mn сайтад 2023 онд өгсөн ярилцлагадаа "Би АНУ-ын WNCAA-д тоглох мөрөөдөлтэй" гэж байв. Тэгвэл өчигдөр/2025.07.01/ NCAA-ийн хоёрдугаар дивизонд харьяалалтай Флоридагийн технологийн их сургуулийн Пантерс баг Н.Нандинхүсэлийг багтаа нэгтгэж буйгаа зарлажээ.

Н.Нандинхүсэлийн ярилцлагыг энд дарж уншина уу

Тус багийн ахлах дасгалжуулагч Эшлигийн мэдэгдэлд "Бид холбон тоглогч Н.Нандинхүсэлийг багтаа нэгтгэж байгаагаа дуулгахад таатай байна. Тэр бол зүрх сэтгэлээрээ, өндөр IQ-тай тоглодог талбайн зохион байгуулагч төдийгүй Флоридагийн технологийн их сургуулийн соёлд тохирох нэгэн. Тэр саяхан Монголын 3х3 шигшээ багаа манлайлан дэлхийн аваргын мөнгөн медальд хөтөлсөн. Олон улсын тэмцээний туршлагаа багт авчирна. Н.Нандинхүсэлийн олон улсын туршлага, сагсан бөмбөгийн төлөөх хүсэл тэмүүлэл манай багийг талбай дээр болон талбайн гадна өөрчлөх болно. Бид зөвхөн чадварлаг холбон тоглогчийг багтаа нэгтгээд зогсохгүй манай хөтөлбөрийг, хамт олныг бадраах нэгнээр бүл нэмлээ" гэжээ.

Флоридагийн технологийн их сургуулийн сагсан бөмбөгийн эмэгтэй баг нь NCAA-ийн хоёрдугаар дивизоны эмэгтэйчүүдийн тэмцээнд нийт есөн удаа оролцож байсан бөгөөд зургаан удаа Саншайн мужийн конференцийн аварга болж, дөрвөн удаа SSC тэмцээний аварга, нэг удаа NCAA хоёрдугаар дивизоны өмнөд бүсийн аварга хүртэж, 2002 онд хоёрдугаар дивизоныхоо шилдэг найман багийн нэг болж байжээ.

Харин Н.Нандинхүсэлийн хувьд нийслэлийн нэгдүгээр сургуулийг төгсөөд АНУ-ын "SPIRE" академид суралцан өнгөрсөн жил эх орондоо эргэн ирсэн билээ. Түүний хувьд дээд лигийн Улаанбаатар Амазонс багийн бүрэлдэхүүнд хоёр улирал тоглохдоо хоёуланд нь аварга авсан түүхтэй.

Ийнхүү 18 насандаа дахин АНУ-ыг зорьж, коллежийн сагсан бөмбөгт хүч үзэхээр болж байна. Өмнө нь түүн шиг АНУ-ын коллежийн сагсан бөмбөгт өрсөлдсөн монгол эмэгтэй сагсан бөмбөгийн тамирчин үгүй.