УИХ-ын тогтоолын төслийг хэлэлцэж, гишүүдийн олонхи нь дэмжлээ

УИХ-ын Аюулгүй байдал гадаад бодлогын байнгын хорооны өнөөдрийн /2025.07.01/ хуралдаанаар Барбадос улстай дипломат харилцаа тогтоох тухай, Эсватинийн Хаант улстай дипломат харилцаа тогтоох тухай, Бүгд найрамдах Тринидад ба Тобаго улстай дипломат харилцаа тогтоох тухай, Бүгд Найрамдах Ботсвана улстай дипломат харилцаа тогтоох тухай УИХ-ын тогтоолын төслийг хэлэлцэж, гишүүдийн олонхи нь дэмжлээ. Иймээс дээрх тогтоолын төслийг УИХ-ын чуулганы нэгдсэн хуралдаанд оруулахаар болж шийдвэрлэв.

Дээр дурдсан улс орнуудтай дипломат харилцаа тогтоосноор НҮБ, түүний төрөлжсөн байгууллагууд, Дэлхийн худалдааны байгууллага зэрэг олон талт тогтолцоо, механизмын хүрээнд нийтлэг ашиг сонирхлын төлөө харилцан дэмжлэг үзүүлж, хамтран ажиллах боломж нэмэгдэнэ гэж үзэж байна.

Сануулахад, Барбадос улс нь 282 мянган хүн амтай, 92.4 хувь нь афирк үндэстэн бол 3.1 хувь нь холимог, 2.7 хувь нь цагаан, 1.3 хувь нь индиан, 75.6 хувь нь христийн шашин шүтдэг байна.

Парламент нь хоёр танхимтай бөгөөд сенат нь 21, ассамблей нь 30 суудалтай аж. Нэг хүнд ногдох ДНБ 21.758 ам.доллар. Аялал жуулчлалын салбар эдийн засгийнх нь 60 хувийг бүрдүүлдэг бол 40 хувийг гадаадын хөрөнгө оруулалтаас бүрддэг.

Шинээр орж ирж буй хөрөнгө оруулагч нарт сонирхол татахуйц татварын хөнгөлөлт үзүүлдэг. Үндэстэн дамнасан корпорациудын хамгийн их сонирхол татдаг зүйл нь 15 сая ам.доллараас давсан орлогод нэг хувийн татвар ногдуулдаг.

Экспортын хэмжээ нь 61.3 сая ам.доллар бөгөөд газрын тосны бүтээгдэхүүн, цагаан хэрэглэл, гар урлал, электрон энд анги, хүнсний бүтээгдэхүүн эзэлдэг ажээ.

Импортын хэмжээ нь 420.7 сая ам.доллар, хүнс, амьтан, химийн бодис, машин механизм импортолдог байна.

Эсватинийн Хаант улс нь 1.2 сая хүн амтай. Хүн амынх нь 89.3 хувь нь христийн шашинтай. Хэмжээлшгүй эрхт хаант засаглалтай.

2024 оны байдлаар ДНБ нь 13 тэрбум ам.доллар. Экспортын хэмжээ нь 2.07 тэрбум ам.доллар бол косметик, элсэн чихэр, химийн бүтээгдэхүүн, мод ундаа, үйлдвэрийн тоног төхөөрөмж экспортолдог. Импортын хэмжээ нь 2.12 тэрбум ам.доллар бол газрын тос, ашигт малтмалын түлш, үйлдвэрийн тоног төхөөрөмж, хөвөн, үр тариа, эм, эмийн бүтээгдэхүүн импортоор авдаг.

Эдийн засгийн голлох салбар нь хөдөө аж ахуй, аялал жуулчлал, мал аж ахуйгаас бүрддэг байна.

Тринидад ба Тобаго улс нь 1.4 сая хүн амтай. Нийт хүн амынх нь 63.2 хувь нь христ, 20.4 хувь нь хинду, 8.3 хувь нь бусад шашныг шүтдэг.

Парламентын бүгд найрамдах улс. Конгрессын дээд танхим нь 31, доод танхим нь 41 суудалтай. 2023 оны байдлаар ДНБ 28 тэрбум ам.доллар байсан. Эдийн засгийн голлох салбар нь үйлчилгээ, аж үйлдвэрийн салбар эзэлдэг.

Экспортын гол бүтээгдэхүүн нь газрын тос зэрэг эрдэс түлш. Оргаинк химийн бодис, ган, бордоо, төмөр экспортолдог. Импортоор түүхий газрын тос, зорчигч тээврийн хэрэгсэл, гар утас зэргийг авдаг. Гадаад өр нь ДНБ-ийн 52.7 хувь эзэлдэг.