Серби улсад өнгөрсөн оны арваннэгдүгээр сард галт тэрэгний буудлын дээвэр нурсан нь авлига, хээл хахуулийг эсэргүүцсэн жагсаал цуглааны эхлэл болсон. 15 хүний амийг авсан ослын буруутнаар иргэд засгийн газар болон ерөнхийлөгч Александр Вучичийг нэрлэж, "Авлига аллага үйлдлээ" гэсэн уриа лоозон барьж жагссан юм. Үүнээс хойш жагсаал цуглаан долоо дахь сардаа үргэлжилж байна.

Тэгвэл Оросын эрх баригчид Сербид үргэлжилж буй засгийн газрын эсрэг жагсаал цуглааныг анхааралтай ажиглаж байна гэж Даваа гаригт /2025.06.30/ мэдэгдлээ. Мөн Сербийн өнгөт хувьсгалыг дэмжихгүй байхыг барууны орнуудад анхааруулав.

ОХУ-ын Гадаад хэргийн сайд Сергей Лавров энэ талаар мэдээлэхдээ "Өөрсдийн ашиг сонирхлыг хангахын тулд бусад улсын дотоод асуудлыг байнга ашигладаг барууныхан энэ удаад өнгөт хувьсгалд оролцохгүй гэж найдаж байна. Бид нөхцөл байдлыг ажиглаж байна. Сербийн ерөнхийлөгч Александр Вучичийн хэлсэнчлэн найрсаг улсын үндсэн хууль, хууль тогтоомжийн дагуу үймээн самууныг намжаахыг бид дэмжиж байна" гэжээ.

Белградын төвд зургадугаар сарын 28-ны өдөр болсон эсэргүүцлийн жагсаалд 140 мянган хүн оролцож, ээлжит бус сонгууль явуулах, Вучичийн 12 жилийн засаглалыг зогсоохыг шаарджээ.

Цагдаа нар жагсагчдыг тараахын тулд нулимс асгаруулагч хий, бороохой ашиглажээ. Эрх баригчдын мэдээлснээр 48 цагдаа шархдаж, 22 хүн эмнэлгийн тусламж авч, 77 хүн баривчлагдсан байна.

Жагсаал өнгөрсөн арваннэгдүгээр сард эхэлснээсээ хойш ерөнхий сайдыг огцруулж, засгийн газрын бүрэлдэхүүнд өөрчлөлт оруулсан. Ерөнхийлөгч Александр Вучич энэ жагсаалыг Сербийн засгийн газрыг огцруулах гадаадын дэмжлэгтэй төлөвлөгөөний нэг хэсэг гэж удаа дараа мэдэгдээд буй. Кремлийн хэвлэлийн төлөөлөгч Дмитрий Песков ч бас "Өнгөт хувьсгал хийдэг алдартай тактик одоо Сербид ашиглагдаж байгааг үгүйсгэх аргагүй" гэсэн юм.