ОХУ-ын арми 2022 оны есдүгээр сард Украины дөрвөн бүс нутгийг эзэлсэн гэж зарласан. Гэвч бодит байдал дээр аль ч мужид нь бүрэн хяналтаа тогтоогоогүй байжээ. Тэгвэл Луганскыг ОХУ бүрэн эзэлсэн гэж тус мужид томилогдсон Оросын албан тушаалтан Леонид Пасечник Даваа гаригт /2025.06.30/ мэдэгдэв. Энэ мэдээлэл үнэн бол Луганск муж гурван жил гаруйн хугацаанд Орост бүрэн эзлэгдсэн Украины анхны бүс нутаг болно.

Германы Гадаад хэргийн сайд Йоханн Вадефул Киевт айлчлахдаа Украины зэвсгийн үйлдвэрлэлд туслана гэж мэдэгдсэн. Тэрбээр "Украиныг гэрээ хэлэлцээ хийхэд туслах нь бидний үүрэг гэж харж байна. Путин өнөөдөр энх тайвны талаар ярьж байгаа ч энэ нь хошиг шогоос өөр юу ч биш. Хэлэлцээр хийхэд бэлэн гэж байгаа нь зөвхөн шоу. Украины өөрийгөө батлан хамгаалах чадварыг хангахын тулд хамтарсан үйлдвэрүүд байгуулах шаардлагатай байна. Яагаад гэвэл Украины хэрэгцээ шаардлага асар их байна" гэсэн юм.

Энэ мэдэгдлийн дараахан ОХУ Луганскыг 100 хувь хяналтдаа авсан гэж Леонид Пасечник хэлжээ.

Энхийн хэлэлцээ явц муутай, Путин ч Украины дөрвөн бүс нутгийг хянах шаардлагаасаа ухраагүй хэвээр. Өдгөө дайны фронт 1000 км орчим үргэлжилж байна. Украины тал холбоотнуудаасаа нэмэлт зэвсгийн тусламжийг цөхрөлтгүй хүсч буй.

Герман бол Украинд үзүүлж буй цэргийн тусламжийн хэмжээгээрээ АНУ-ын дараа ордог улс. Тус улсын топ дипломатч Йоханн Вадефулын айлчлал 48 цаг үргэлжлэх ба тэрбээр ерөнхийлөгч Зеленскийтэй уулзах төлөвтэй байна.