Прокурорын байгууллага 2025 оны зургаадугаар сарын 23-27-ны өдрүүдэд нийт 53,850 эрүүгийн хэрэгт хяналт тавьж, 834 хэрэгт яллах дүгнэлт үйлдэн шүүхэд шилжүүлжээ. Тус хугацаанд 1691 гэмт хэргийн шинжтэй гомдол, мэдээлэл бүртгэгдэж, 751 шинэ хэрэг нээн шалгасан байна. Шүүхэд шилжүүлсэн хэргүүдийн дийлэнхийг эрүүл мэнд, өмчлөх эрх, зам тээвэр, бэлгийн халдашгүй байдал, авлига зэрэг гэмт хэрэг эзэлжээ.

Тодруулбал:

• 313 хэрэг – Эрүүл мэндийн халдашгүй байдлын эсрэг
• 208 хэрэг – Өмчлөх эрхийн эсрэг
• 169 хэрэг – Зам тээврийн аюулгүй байдал
• 30 хэрэг – Бэлгийн халдашгүй байдал
• 15 хэрэг – Авлига
• 20 хэрэг – Хүний амьд явах эрхийн эсрэг
• 20 хэрэг – Нийтийн албаны ашиг сонирхлын эсрэг
• 9 хэрэг – Хүний халдашгүй чөлөөтэй байх эрхийн эсрэг
• 8 хэрэг – Олон нийтийн аюулгүй байдал ашиг сонирхлын эсрэг
• 6 хэрэг – Цахим мэдээллийн аюулгүй байдлын эсрэг
• 5 хэрэг – Эдийн засгийн
• 4 хэрэг – Хэрэг хянан шийдвэрлэх ажиллагааны эсрэг гэмт хэрэг
• 2 хэрэг – Соёлын өвийн эсрэг
• 1 хэрэг – Хүүхдийн эсрэг гэх мэт…

Онцлох хэргүүд:

• Насанд хүрээгүй охидын биеийг нь үнэлүүлсэн хэрэг: О.П, Б.Э нар нь насанд хүрээгүй охидыг орон гэр, мөнгө санхүүгийн боломжгүй байдлыг нь ашиглан орон байраар хангасны дараа цахим орчинд “санхүү авна” гэх зар байршуулж, биеийг нь үнэлүүлж ашиг олсон. Тэдэнд Эрүүгийн хуулийн 12.1 (Хүчиндэх), 13.1 (Хүн худалдаалах) зүйл ангиар яллах дүгнэлт үйлдэж, хэргийг шүүхэд шилжүүлжээ.
• Зам тээврийн төвийн ажилтан хахууль авсан хэрэг: “Зам тээврийн хөгжлийн төв” ТӨҮГ-т ажиллаж байсан С.Э нь тээврийн хэрэгслийг стандарт зөрчиж нэвтрүүлэхийн тулд жолооч нараас хахууль авч байжээ. Үүнд оролцсон жолооч нарт ч мөн хахууль өгсөн үндэслэлээр ял ногдуулахаар болсон байна.
• Гаалийн албан тушаалтнуудын зөрчил: Э.Б, П.Б нар нь гаалийн шалгалтыг дутуу хийж, худал мэдээлэл өгснөөр иргэдэд давуу байдал бий болгосон байна.
• Замын ажил гүйцэтгээгүй байхад төсөвт мөнгө гаргуулсан хэрэг: Л.Л гэх иргэн орон нутгийн замын ажлын хяналтын инженерээр ажиллаж байхдаа хийж гүйцэтгээгүй ажлыг хийсэн мэтээр бүртгүүлж, улсад 90.8 сая төгрөгийн хохирол учруулжээ.
• Химийн бодисыг хууль бусаар хадгалсан хэрэг: “О” ХХК нь калийн дихромат, натрийн карбонат зэрэг аюултай химийн бодисыг зөвшөөрөлгүй хадгалж байсныг илрүүлжээ.

Прокурорын байгууллагаас дээрх болон бусад олон хэргийг Баянгол, Хан-Уул, Сонгинохайрхан дүүргийн болон орон нутгийн анхан шатны шүүхүүдэд шилжүүлээд байна.

С.УЧРАЛ