Орос, Хойд Солонгосын хооронд иж бүрэн стратегийн түншлэлийн гэрээ байгуулсны нэг жилийн ой тохиож байна. Энэ хүрээнд ОХУ-ын Соёлын сайд Ольга Любимова тэргүүтэй төлөөлөгчид Бямба гаригт /2025.06.28/ Хойд Солонгост айлчилжээ.

Удирдагч Ким Жон Ун Соёлын сайд Ольга Любимоватай уулзаж, хоёр улсын соёл, урлагийн хамтын ажиллагааг цаашид гүнзгийрүүлэх талаар ярилцжээ. Уулзалт Ням гаригт /2025.06.29/ эрх баригч намын төв хорооны байранд болсон бөгөөд Хойд Солонгост суугаа ОХУ-ын Элчин сайд Александр Мацегора мөн оролцсон байна.

Талууд 2025-2027 оны хооронд хэрэгжих хоёр орны Соёлын яам хоорондын хамтын ажиллагааны хэлэлцээрт гарын үсэг зурав.

Айлчлалыг тохиолдуулан Пятницкийн нэрэмжит найрал дуу, Гжелийн нэрэмжит Москвагийн үндэсний бүжгийн эрдмийн театрын жүжигчид мөн Пёньянд хүрэлцэн иржээ. Пятницкийн нэрэмжит найрал дууны баг нь жил бүрийн дөрөвдүгээр сарын 15-нд Ким Ил Суны мэндэлсний ойн арга хэмжээний хүрээнд зохиогддог Умардын соёлын наадамд урилгаар оролцдог гэдгээрээ алдартай.

Хойд Солонгосын төрийн хэвлэл "KCNA" агентлагийн нийтэлсэн зургуудыг харахад урлагийн тоглолтын үеэр арын дэлгэц дээр Украинд тулалдаж буй хойд солонгос цэргүүдийн зургийг харуулжээ. Мөн хоёр улсын төрийн далбааг намируулан зогсох цэргүүдийг харуулжээ.