НЭМЭЛТ:

Монгол охид түүх бүтээж, дэлхийн аваргын финалд шалгарлаа. Тэд дөнгөж сая Польшийн шигшээ багийг нэмэлт цагт Б.Ариунцэцэгийн хожлын шидэлтээр буулган авав.

FIBA 3×3 сагсан бөмбөгийн ДАШТ-ий зургаа дахь өдрийн тоглолтууд өчигдөр/2025.06.28/ болж, өнөөдөр медалийн төлөөх багууд тодорлоо. Дэлхийн аваргын зургаа дахь өдөр Монгол болон Германы багууд олны анхаарлын төвд оров.

ГЕРМАНЫ ЭРЭГТЭЙЧҮҮДИЙН ШИГШЭЭ БАГ

Өнгөрсөн жил Улаанбаатар хотноо 23 хүртэлх насны дэлхийн аваргад түрүүлж байсан Германы залуучуудын шигшээ баг энэ жил түвшин ахиж, улсаа төлөөлж байна. Хурдтай, тэсрэлттэй, шидэлттэй залуу багийг зогсооно гэдэг бүтэшгүй зүйл мэт.

Тэд хасагдах шатны эхний тоглолтдоо олимпийн аварга Нидерландын хүчирхэг багийг буулган авч, улмаар өчигдөр АНУ-ын шигшээг хожжээ. Тус тоглолтод Дензель Агьеман гангарч, хоёр онооны шидэлтийг дөрвөн удаа амжилттай болгож, дэлхийн аваргын мөнгөн медальт багийг гэр рүү нь үджээ.

Германы шигшээ багийн нас залуу, туршлага тааруу гэж үзэх хүн болох байх ч тэд тоглолтоос тоглолтод сайжирч, дэлхийн шилдгүүдийг хожиж байна. Өнөөдөр ч дэлхийн аварга болохыг үгүйсгэхгүй.

МОНГОЛЫН ЭМЭГТЭЙЧҮҮДИЙН ШИГШЭЭ БАГ

Чингис хааныхаа өмнө, Сүхбаатарынхаа талбай дээр монгол охид үнсгэлжингийн үлгэрийг бодитоор амилуулж байна. Тэмцээн эхлэхээс өмнө тэднийг энд хүрнэ гэж таамаглаж байсан хүн олон байгаагүй. Гэвч тэд өчигдөр дэлхийн аварга АНУ-ын шигшээг хожиж, хагас шигшээд шалгарлаа.

АНУ-ын шилдэг багийг буулган авахад О.Хулан шилдэг тоглолтоо гаргаж, есөн оноо авчээ. Мөн эгзэгтэй мөчид залуу тамирчин Н.Нандинхүсэл чухал торгуулийн шидэлтүүдийг амжилттай гүйцэтгэж, ард түмнээ баярлуулсан. Магадгүй тэдний энэхүү ялалт 3х3 сагсан бөмбөгийн түүхэн дэх хамгийн итгэмээргүй, таамаг эвдсэн ялалт биз.

Өнөөдөр тэд Польшийн эсрэг тоглоно.

Хагас шигшээн оноолт /эр/

• Серби – Швейцарь
• Испани – Герман

Хагас шигшээн оноолт /эм/

• Нидерланд – Канад
• Польш – Монгол