Улаанбурхан өвчний халдвар өндөр байгаатай холбогдуулж Эрүүл мэндийн сайд Ж.Чинбүрэн мэдэгдэл хийгээд байна.  Энэ үеэрээ тэрбээр вакцинд хамрагдаагүй хүүхдийг сургууль, цэцэрлэгт суулгахгүй гэдгийг онцоллоо.

Эрүүл мэндийн сайд Ж.ЧИНБҮРЭН:

-Сүүлийн долоо хоногт улаанбурханы халдвар 1500-гаар нэмэгдэж, 10075 тохиолдол бүртгэгдээд байна. Улаанбурхан өвчний улмаас долоон бяцхан зүрх зогслоо. Улаанбурхан бол вирусын өвчин, үр хүүхдийг маань онилдог хорон өвчин.

Дэлхий нийт 62 жилийн өмнө вакцин гаргаж, урьдчилан сэргийлж чаддаг болсон. Манай улс хүүхэд багачуудаа вакцинд өргөнөөр хамруулж, улаанбурхан өвчнийг мартахдаа хүрсэн амжилттай цаг үе бий. Гэвч шинжлэх ухааны ололтоор урьдчилан сэргийлэх ухамсар ухаан дутсаны хор уршгийг өнөөдөр та бид үр хүүхдийнхээ эрүүл мэнд, амь насаар амсаж байна.

10 жилийн өмнө улаанбурхан өвчин хүчтэй дэгдэж, 180 хүүхэд  амиа алдаж, вакцины хүчээр давж гарсныг ийм амархан мартах учиргүй.

Өнөөдөр 10 хүүхдийн гурав нь вакцинаа хийлгэсэн байна. Харин халдвар авсан 10 хүүхдийн долоо нь вакцингүй байгааг харьцуулаад бодоорой. Вакцинтай хүүхэд халдвар авах нь ч бага, туссан ч хүндрэлгүй даван гарч байна.

Монгол Улс товлолт вакцинд үнэ төлбөрнгүЙ хамруулдаг хуультай. Ирэх намар вакцин хийлгээгүй хүүхэд цэцэрлэг, сургуульдаа сууж чадахгүй болно гэдгийг анхааруулъя.

Вакцины талаар худал мэдэмхийрч бусдын хүүхдийн амь насаар тоглох, үндэсний аюулгүй байдалд ноцтой хохирол учруулагч этгээдийг төрийн хууль дуудаж эхэлсэн гэдгийг мэдэгдье.

Улаанбурхан хүүхдэд илүү хорон өвчин, дархлааны ой санамжийг устгаж өвчлөмтгий болгодог ёрын өвчин. Улаанбурхан тархи хараа, сонсголд хор нөлөө үзүүлдэг муухай өвчин. Улаанбурхан үргүйдэлд хүргэдэг эвгүй өвчих. Таны үр удам тасрах ёсгүй гэж бодож байгаа бол яг одоо хүүхдээ хөтлөөд гараарай, вакциныг нь хийлгээрэй” гэлээ.

Г.ХОРОЛ