Италийн шүүх химийн бодис үйлдвэрлэгч компанийн хуучин удирдлагуудад гүний усыг бохирдуулсан хэргээр 17 жил хүртэл хорих ял оноолоо. Тодруулбал, Виченца хотын шүүх Пүрэв гаригт (2025.06.26) тус компанийн удирдах албан тушаалтан байсан 15 шүүгдэгчээс 11-д нь ял оноосон байна. Үлдсэн дөрвөн хүнийг цагаатгасан. Тухайн 11 хүнийг химийн үйлдвэрт албан тушаал хашиж байхдаа гүний усыг "PFAS" гэх бодисоор хордуулсан хэрэгт буруутгасан байна. Энэ нь фторын органик нэгдлүүдийн бүлэг бөгөөд зарим нь хортой гэж тооцогддог.

Гэмт хэрэгт холбогдсон 11 албан тушаалтны хорих ял хоёр жил найман сараас 17 жил зургаан сар хүртэл байна. Тэдний гурав нь химийн үйлдвэрийн толгой компани байсан Японы Мицубиши корпорацийн япончууд юм. Түүнчлэн хоёр хүнд нь 16 жил, нөгөөд нь 11 жилийн хорих ял оноосон гэх мэдээлэл байна. 1960-аад оноос 2018 онд буюу дампуурах хүртлээ тухайн химийн үйлдвэр нь "PFAS" химийн бодис зэрэг бүтээгдэхүүн үйлдвэрлэж байсан. Мицубиши корпорац шүүхийн шийдвэртэй холбоотой байх тул тайлбар хийхээс татгалзсан байна.