Европын холбооны удирдагчид Пүрэв гаригт (2025.06.26) Брюссельд болсон дээд хэмжээний уулзалтын үеэр АНУ-ын худалдааны хэлэлцээний талаар шинэ саналыг хэлэлцжээ. Комиссын ерөнхийлөгч Урсула фон дер Лейен тарифын хэлэлцээ бүтэлгүйтэх магадлалыг үгүйсгээгүй ч бүх сонголтууд хэвээр байна гэж онцлон тэмлэглэсэн байна. АНУ-ын ерөнхийлөгч Дональд Трампын олон улсад гаргасан өндөр тариф долдугаар сарын 9-нд дуусгавар болох бөгөөд энэ үеэс өмнө Европын холбоо тодорхой шийдвэрт хүрэх гэж хичээж байна.

Германы канцлер Фридрих Мерц Европын холбоог "удаан бөгөөд төвөгтэй" гэхээсээ илүү "хурдан бөгөөд энгийн" худалдааны хэлэлцээ хийхийг уриалав. Гэхдээ Францын ерөнхийлөгч Эммануэль Макрон тусдаа мэдээлэл хийх үеэрээ хурдан бөгөөд прагматик худалдааны хэлэлцээ хийхийг хүсч байгаа боловч тодорхой бус нөхцөлүүдийг хүлээн зөвшөөрөхгүй гэж мэдэгдэв. Тэрбээр мөн шударга хэлэлцээ явуулахын тулд бүхий л арга хэрэгслийг хэрэгжүүлэх ёстой гэж мэдэгдсэн бөгөөд АНУ-ын тал 10 хувийн суурь тарифаа цуцлах ёстой гэж үзэж буйгаа онцлон тэмдэглэжээ.

Европын холбоо АНУ-ын 24.55 тэрбум ам.долларын бараанд гаалийн татвар ногдуулахыг зөвшөөрсөн. Гэсэн хэдий ч ногдуулаагүй хэвээр байгаа бөгөөд АНУ-ын импортын 95 тэрбум еврогийн бараанд нэмэлт татвар ногдуулах тухай хэлэлцэж байна. Тэд мөн "Alphabet Inc"-ийн "Google", "Meta", "Apple", "X", "Microsoft" зэрэг АНУ-ын аварга компаниудыг онилж магадгүй аж.