Эквадорын хар тамхины эзэнт гүрний хаан, эрэн сурвалжлагдаж байсан оргодол Адолфо Макиас Вилламар баривчлагджээ. Макиас буюу олноо Фито гэх нэрээр танигдсан тэрбээр Лос Чонерос гэмт бүлэглэлийн тэргүүн юм. Тус бүлэглэлээс болж Эквадор улс аялал жуулчлалын төв бус гэмт хэргийн гаралт хамгийн өндөртэй газар болж хувирсан гэлцдэг. 2023 оны ерөнхийлөгчийн сонгуульд нэр дэвшигч Фернандо Виллависенсиогийн амь насанд халдсан хэрэгт мөн Фитог буруутгадаг.

Тэрбээр Манта хотод нэгэн тансаг байшингийн доорх хоргодох байранд нуугдаж байжээ. Цагдаа, цэргийнхний хамтарсан 10 цагийн ажиллагааны эцэст түүнийг баривчилсан байна. Байшингийн шалны нэг хэсэг нь занга байдлаар гулсаж доошоо ордог байжээ. Хоргодох байрыг агааржуулагч, ор, сэнс, хөргөгч сэлтээр тохижуулсан байв. Харин үндсэн байшинг бялдаржуулах төхөөрөмжүүд, билльярд, ширээний хөлбөмбөг зэргээр тохижуулжээ.

Фитог баривчилсан даруйдаа Эквадорын хамгийн том шоронгууд байрладаг Гуаякил боомт хот руу онгоцоор авч явжээ. Тэрбээр ямар ч эсэргүүцэл үзүүлээгүй аж. Түүнийг хамгийн өндөр хамгаалалтай Ла Рока шоронд шилжүүлсэн байна.

Эквадорын ерөнхийлөгч Даниел Нобоа хүчний байгууллагынхныг сайшаахын зэрэгцээ Фитог АНУ руу шилжүүлнэ гэж мэдэгдлээ. Учир нь АНУ түүнийг кокаин хууль бусаар хил нэвтрүүлсэн хэрэгт буруутгаж байгаа юм.