Хойд Солонгос улс зургадугаар сарын 24-ний өдөр Вонсан Калма аялал жуулчлалын бүсийг нээлээ. Далайн эргийн шинэ амралтын газрын нээлтэд удирдагч Ким Жон Ун гэр бүлийн хамтаар оролцов. Ихэвчлэн пуужин хөөргөлт гэх мэт улс төрийн үйл ажиллагаанд оролцдог Ким Жон Ун энэ удаад гэр бүлээрээ нэг өдрийг амарч өнгөрүүлжээ. Тэрбээр хажуудаа тамхи, хүйтэн ундаа сэлтийг тавиад амрагчдыг ажиглан ердийнхөөсөө илүү тайван дүр төрхтэйгөөр нээлтэд оролцсон байна.

Украины эсрэг дайнд Оростой нэгдсэн, цөмийн зэвсэг хөгжүүлсэн зэргээр олон улсын шүүмжлэлийг байнга хүлээдэг Хойд Солонгосын удирдагчийн хувьд далайн эргээр ийнхүү зугаалсан нь ховорхон бөгөөд нөхөрсөг түүх болов.

Вонсан Калма бүс нь тус улсын аялал жуулчлалыг хөгжүүлэх төлөвлөгөөний нэг хэсэг. Ирээдүйд зөвхөн хойд солонгосчуудаар тогтохгүй гадаадын иргэд ч энд ирж амрана гэж үзэж байна. Зүүн эрэг дагуу байрлах уг амралтын бүсэд спорт, хоол, тоглоом гээд юм бүхнийг хийх боломжтой. Амралтын газрыг долдугаар сарын 1-нд албан ёсоор нээж, жилд 20 мянган хүн хүлээн авахаар төлөвлөж байна.

Төрийн мэдээллийн "KCNA" агентлагт дурдсанаар Ким Жон Ун тус амралтын газрыг "Хойд Солонгосын энэ оны хамгийн том амжилт" гэж нэрлэв.

Төслийн бүтээн байгуулалтад 10 гаруй жил зарцуулсан бөгөөд энэ хугацаанд үнийн өсөлт зэрэг амаргүй зүйлс ч тохиолдсоныг Ким Жон Ун онцолжээ. Мөн энэхүү амралтын бүс нь Хойд Солонгосын аялал жуулчлалын соёлд голлох үүрэг гүйцэтгэнэ гэлээ.