Дэлхийн эдийн засгийн форумаас зохион байгуулдаг Зуны Давос чуулга уулзалт энэ сарын 24-ий өдрөөс 26 хүртэл Хятадын Тяньжин хотноо болж байна. Энэхүү чуулга уулзалт нь инноваци, энтрепренершип, олон улсын яриа хэлэлцээний дэлхийн тавцан болж, хөгжиж буй эдийн засагтай орнуудын цаашдын зорилгыг тодорхойлж байна.

Хятадын Төрийн зөвлөлийн ерөнхий сайд Ли Цян Лхагва гаригт (2025.06.25) чуулга уулзалтад оролцож, дэлхийн эдийн засаг, худалдааны хурдацтай хөгжиж буй нөхцөл байдалд илүү бүтээлч, хамтын хүчин чармайлт гаргах шаардлагатай байгааг онцлон тэмдэглэжээ. Тэрбээр мөн 16 дахь чуулга уулзалтын нээлтийн хурал дээр үг хэлэхдээ цаашид дэлхийн худалдааны сүлжээ өөрчлөгдөж магадгүй гэж мэдэгдсэн байна. Тодруулбал, "Олон улсын эдийн засаг, худалдааны талбар эрс өөрчлөлтийг даван туулж байна" гэж Ли хэлэхдээ, дэлхийн өмнөд бүсийн нөлөө нэмэгдэж, уламжлалт худалдааны гинжин хэлхээ салбаруудын гэнэтийн өөрчлөлттэй тулгарч буйг онцолжээ. Тэрбээр үргэлжлүүлэн эдийн засгийн систем улам олон янз болж байгаагийн зэрэгцээ тогтворгүй байдал нэмэгдсээр байна гэсэн юм. Мөн "Хил дамнасан хөрөнгө оруулалт тогтворгүйгээр буурч, бүс нутгийн хамтын ажиллагаа өргөжин тэлж, үйлдвэрлэл, нийлүүлэлтийн хуваагдал үүсэх эрсдэл нэмэгдэж байгааг бид харж байна" гэв.

Тиймээс эдийн засгийн тогтвортой байдал, хамтын ажиллагааг дэмжих талаар бүтээлч арга хэмжээ авахыг ерөнхий сайд Ли уриалав. "Бид чөлөөт худалдаа, олон талт үзлийг хамгаалах, дэлхийн эдийн засгийн тогтвортой хөгжлийг хангах бодит алхмуудыг идэвхтэй хийх ёстой" гэж тэрбээр уриалав. Олон улсын эдийн засгийн солилцоонд маргаан, санал зөрөлдөөн гарах нь зүй ёсны хэрэг гэдгийг хүлээн зөвшөөрч, яриа хэлэлцээ хийж, харилцан хүндэтгэхийг мөн уриалсан байна. "Бид тэгш эрхтэй зөвлөлдөж л байвал шийдэл ямагт олдоно" гэж Ли нээлтийн хурлын төгсгөлд мэдэгджээ.

Ерөнхий сайд Ли мөн хамтын ашиг сонирхлыг хамгаалахын тулд харилцан ашигтай хамтын ажиллагаа нь дэлхий дахинд тулгарч буй сорилтуудыг даван туулахад чухал болохыг онцлон тэмдэглэв. Тэрбээр улс орнуудын макро бодлогын уялдаа холбоог бэхжүүлэхийг уриалж, дэлхийн нийлүүлэлтийн сүлжээний уян хатан, аюулгүй байдлыг бэхжүүлэхийн тулд олон улсын нягт хамтын ажиллагааг уриалсан байна.