АНУ-ын ерөнхийлөгч Дональд Трамп Лхагва гаригт /2025.06.25/ Украинд “Патриот” пуужингийн систем дахин нийлүүлэх талаар бодож үзнэ гэж мэдэгдлээ. Мөн “Владимир Путин энэ дайныг дуусга үнэхээр шаардлагатай байна” гэв.

Гааг хотноо болсон НАТО-ийн чуулганы үеэр Трамп, Зеленский нар тусдаа уулзжээ. Тэд 50 минутын турш ярилцсаны эцэст Трамп энэ мэдэгдлийг хийсэн байна. Хоёр удирдагчийн хэн хэн нь энэ шийдвэрээ мөргөлдөөнийг зогсоох эерэг алхам гэж нэрлэлээ.

Трамп Орос, Украины дайныг бусад дайнаас илүү хэцүү гэж тодорхойлсон юм.

Тэрбээр Украины зэвсгийн тусламжийн асуудлыг нэг хэсэг хаячихсан байсан гэхэд болно. Энэ удаад түүнээс АНУ-ын Украинд туслах санхүүжилт юу болж байгааг асуухад “Мөнгөний асуудал яах нь уу харж л байя” гэсэн хариулт өгсөн аж.

АНУ-д үйлдвэрэсэн “Патриот” систем нь ОХУ-ын баллистик пуужинг буудаж унагаахад нэн чухал үүрэгтэй. Сүүлийн долоо хоногуудад Украины хотууд Оросын баллистик пуужингийн мөндөр дор байгаа билээ.

Цаашилбал, АНУ, Украины талууд нисгэгчгүй нисэх онгоцны хамтарсан үйлдвэрлэлийн талаар ярилцжээ.

Дашрамд дурдахад, Зеленский энэ удаад цэргийн хувцас биш илүү албан дүр төрхтэйгөөр хүрэлцэн иржээ. Цагаан ордонд хоёрдугаар сард болсон дуулиантай уулзалтаас хойш Зеленский Трампын засаг захиргаатай харилцаагаа сайжруулахыг эрмэлзсээр байгаа билээ.