Украины армийн дүрэмт хувцастай хоёр эрэгтэй ойн цоорхойд Дональд Трамп, Ж.Д.Вэнс, Элон Маск нарын зургийн өмнө зогсоод, "Бидэнд та нар шиг холбоотон хэрэггүй" гэж хэлж байгаа бичлэг "Polska Grupa Informacyjna" гэх Польшийн телеграм сувагт нийтлэгдсэн. Гэвч энэ нь хүмүүсийг төөрөгдүүлэх зорилготой хуурамч бичлэг аж. "BBC" агентлагийн олж мэдсэнээр Оросын суртал ухуулга хийдэг польш хэл дээрх 22 суваг байгаагийн нэг нь "Polska Grupa Informacyjna" юм. Эдгээр сувгаар дамжин 150 мянга гаруй хүн тархиа угаалгажээ.

Польш улсад телеграм төдийлөн түгээмэл биш. Гэсэн ч телеграм дахь худал мэдээлэл хэт даврагч бүлгүүдээр дамжин илүү өргөн хүрээтэй бусад платформд тархдаг гэж үздэг.

Дээр дурдсан 22 суваг нь өөрсдийгөө Польшийн мэдээ, мэдээллийг түгээдэг гэж танилцуулга дээрээ бичсэн байдаг. Тэд өөрсдийгөө төвийг сахисан, шударга тэнцвэртэй мэдээ мэдээллийг түгээдэг, далд үнэнийг хуваалцдаг, үнэн хэрэгтэй газарт байдаг гэх зэргээр өргөмжилжээ. Энэ мэтчилэн найдвартай мэдээллийн суваг мэт харагдахыг хичээдэг ч тэд яг үнэндээ Оросыг дэмжсэн мэдээлэл түгээдэг аж.

Европын холбооны хоригт багтсан "RT", "Sputnik" зэрэг Оросын хэвлэлийн мэдээг байнга эш татдагаас нь үүнийг тодорхойлж болно. Мөн тэдгээр суваг нь Владимир Путин, Дмитрий Медведев, Гадаад хэргийн яамны хэвлэлийн төлөөлөгч Мария Захарова, хөтлөгч Владимир Соловьев, дайныг дэмжигч блоггерууд гэх мэт Оросын засгийн газрын чухал хүмүүс, тэдний дэмжигчдийн хэлсэн үг, мэдээллийг хуваалцдаг.

Оросын талыг баримтлагчдаас эш татахаас гадна илт худал мэдээлэл хуваалцах нь ч бий. Тухайлбал, "UKR LEAKS_pl" нэртэй нэгэн суваг цэргийн хувцастай хүмүүс бусдад хуурамч цус түрхэж буй зураг нийтэлжээ. Бичлэгийн тайлбар хэсэгт "Бучагийн хохирогчид ингэж бий болсон юм" гэсэн байв. Энэ нь Бучагийн аллагыг хуурамч гэж харуулах оролдлого юм.

Гэвч 2022 онд Оросын цэргүүд Буча хотод хэдэн зуун украин хүнийг хоморголон хөнөөсөн нь олон эх сурвалжаар нотлогдсон билээ.

Зарим телеграм суваг нь Украины удирдагчид болон цэргүүдийг "нацистууд" гэж байнга нэрлэдэг. Тухайлбал, "InfoDefensePOLAND" суваг Украины засгийн газрыг "Нацист дэглэм" гэж нэрлэжээ.

Дан худал мэдээлэл түгээдэг гэхээсээ илүү үнэн бодит мэдээллийг ч бас оруулдаг гэдгийг энд дурдах нь зүйтэй. Мөн уншигчдад төөрөгдөл төрүүлэхийн тулд чухал мэдээллийг илт орхигдуулдаг.

"BBC"-ийн олж мэдсэнээр тэдгээр сувгийн олонх нь 2022 онд дайн эхэлснээс хойш гарч иржээ. Зарим нь өмнө нь орос хэл дээр мэдээ мэдээлэл түгээдэг байжээ.

ТЕЛЕГРАМ БОЛ ЭХЛЭЛИЙН ЦЭГ 

Польш дахь баримт шалгах "Demagog" байгууллагын ажилтан Алексей Шимкевичийн хэлснээр дайн эхэлснээс хойш Оросын нөлөөллийн ажиллагаа Польшийн цахим мэдээллийн ертөнцөд байнгын зүйл болжээ. Тэрбээр "Телеграм бол эхлэлийн цэг. Худал мэдээлэл тэнд эхлээд нийтлэгдэнэ. Дараа нь Х гэх мэт томоохон платформ руу тардаг. Эдгээр суваг нь Украины дэмжлэгийг таслан зогсоох, олон нийтийн санаа бодлыг туйлшруулах, Польш, Украины нийгэмд хагарал үүсгэх зорилготой" гэв.

Польшууд украин дүрвэгчдээс залхаж эхэлсэн нь зарим талаараа суртал ухуулгаас үүдэлтэй аж. Дүрвэгчдийг авиргүй, хуульгүй "амьтад" байгаа мэтээр телеграмд дүрсэлдэг.

Мөн Европын холбооны орнууд цэргийн зардлаа нэмэгдүүлэх болсон тул иргэд нь ядуурах болсон, ялангуяа Польш улсад энэ нь хамгийн их хамаатай гэсэн нийтлэлүүд сүүлийн үед телеграмд түлхүү цацагдах болжээ. Улсын эдийн засаг, соёлтой холбоотой ийм мэдээллүүд нь иргэдийн бодит айдас дээр тоглож буйгаараа онцлог.

Оросыг дэмжигч телеграмд сувгуудийн ард хэн байгаа нь тодорхойгүй. Гэхдээ ОХУ, Беларусьтай холбоотой хүмүүс байгаа гэж зарим шинжээч таамаглаж байна. Тэдгээр сувгийн мэдээгээ нийтэлдэг цаг Москвад ажил эхлэх цагтай давхацдаг болохыг шинжээчид ажиглажээ.

Угтаа бол Европын холбооны гишүүн Польш улс нь дайн эхэлснээс хойш Украиныг тууштай дэмжсэн билээ. Дайны эхний саруудад цэргийн тусламжийн хэмжээгээрээ Польш улс холбоотнууд дундаа тэргүүлж байв. Батлан хамгаалахын нэр хүндтэй түнш гэж нэрлэгдээд буй тус улс 2022 оноос хойш нэг сая орчим украин дүрвэгч хүлээн авсан гэх тооцоолол байна.