Хятадын автомашин үйлдвэрлэгчид цоо шинэ автомашиныг хуучин гэж хуурамчаар шошголон гадаадын улсуудад зарж борлуулж байна. Нэг ч км яваагүй тэдгээр машиныг ОХУ, Төв Ази, Ойрхи Дорнод руу ихэвчлэн экспортолдог. Ийм борлуулалтын замаар тэд худалдааны ерөнхий дүнгээ өссөн үзүүлэлттэй харагдуулахаас гадна дотооддоо зарагдаж өгөхгүй байгаа машинуудаасаа ангижирдаг гэж үзэж байна.

"Sino Auto Insights" зөвлөх үйлчилгээний үүсгэн байгуулагч Ту Ле хэлэхдээ "Энэ бол дөрвөн жил орчим үргэлжилсэн үнийн дайны үр дүн. Автомашин үйлдвэрлэгчид боломжит бүх л борлуулалтыг хийхээр хичээж байна" гэсэн юм.

Шинэ машинуудыг хуучин гэж шошголон гадаадад төдийгүй дотооддоо борлуулж байгааг Хятадын автомашин үйлдвэрлэгч "Great Wall Motor" компанийн захирал тавдугаар сард анх асуудал болгон хөнджээ. Үүний дараа Хятадын төрийн хэвлэл "People’s Daily" дотооддоо ийм байдлаар автомашин борлуулах нь буруу гэсэн мэдээ гаргасан байна. Дотоодод үнийн дайнтай байгаа үед ийм арга хэрэглэх нь буруу тул зохицуулалтын арга хэмжээ авахыг мөн уриалжээ.

Гэвч Хятадын орон нутгийн засгийн газрууд шинэ машиныг хуучин гэж нэрлэн экспортлохыг идэвхтэй дэмжиж байна. Энэ нь дээд удирдлагын зүгээс тавьж буй эдийн засгийн өсөлтийн амбицтай зорилгод хүрэх арга зам юм. Орон нутгийн засгийн газрууд энэ төрлийн экспортыг дэмжихийн тулд нэмэлт лиценз бий болгох, татварын хөнгөлөлтийн нэхэмжлэлийг шуурхай хянах, экспортын дэд бүтцэд хөрөнгө оруулалт хийх, хуучин автомашины экспортыг дэмжих арга хэмжээг санхүүжүүлэх зэрэг арга хэмжээ авч байна.

Хятад улс 2019 оноос албан ёсоор хуучин автомашин гадаадын улсад экспортолдог болсон. Энэ үеэс шинэ машинаа хуучин болгож зарах тактик эхэлжээ. 2024 онд экспортолсон 436 мянган хуучин автомашины 90 хувь нь тэг км-тэй буюу шинэ машинууд байжээ.