ОХУ-ын ерөнхийлөгч асан бөгөөд Аюулгүйн зөвлөлийн дэд дарга Дмитрий Медведев өнгөрсөн Ням гаригт /2025.06.22/ хэд хэдэн орон Иран руу цөмийн цэнэгт хошуу нийлүүлэхээр төлөвлөж байгаа гэсэн мэдэгдэл цахим сүлжээндээ нийтэлсэн билээ. Энэ нь АНУ-аас Иранд цохилт өгсөнтэй холбоотой аж.

Тэрбээр нийтлэлдээ "Энэ цохилт АНУ-ыг шинэ мөргөлдөөнд татан оролцууллаа. Хэд хэдэн улс Иранд тэдний өөрсдийнх нь цөмийн цэнэгт хошууг нийлүүлэхэд бэлэн байна" гэсэн юм.

Владимир Путины топ зөвлөх Медведев чухам аль улсууд гэдгийг дурдаагүй боловч түүний мэдэгдэл шинжээчдийн дунд эргэлзээ тээнэгэлзлийг төрүүлж байна.

Тухайлбал, НҮБ-ын Зэвсэг хураах судалгааны хүрээлэнгийн Үй олноор хөнөөх зэвсгийн хөтөлбөрийн ахлах судлаач Павел Подвиг "Цөмийн зэвсэг бол тэсрэх бөмбөг ч юм уу, цүнх саванд хийгээд явж болдог тийм зүйл биш. Тэгэхээр энэ нь практикт боломжгүй юм. Цөмийн цэнэгт хошуу бол аюулгүйгээр хадгалах, ажиллуулахад бэлтгэгдсэн мэргэжилтнүүдтэй, засвар үйлчилгээний байгууламж, тоног хэрэгслүүдтэй бүхэл бүтэн систем. Бага хэмжээний тэсрэлт үүсгэдэг зөөврийн тактикийн цөмийн зэвсэг байсан ч өндөр зэрэглэлийн хадгалалтын технологи шаарддаг. Тухайн улс нь дотооддоо цөмийн хөтөлбөр хэрэгжүүлээгүй л бол хэцүү. Үүнээс гадна энэ нь НҮБ-ын Цөмийн зэвсгийг үл дэлгэрүүлэх гэрээг зөрчсөн үйлдэл болно. Европ дахь цөмийн зэвсгүүд Америкийн хамгаалалтад байдаг. Беларусь дахь Оросын цөмийн зэвсгүүд ч адил. Тэгэхээр техникийн хувьд боломж харагдахгүй байна" гэжээ.

Охайо муж дахь Урьдчилан сэргийлэх судалгааны үндэсний хүрээлэнгийн үүсгэн байгуулагч Адам Лаутерын хэлснээр Медведев гурван улсыг л тухайлан дурдсан байж магадгүй. Тэр нь Хойд Солонгос, ОХУ, Хятад юм. АНУ-ын дайсан эсвэл өрсөлдөгч гэж тооцогдож буй цөмийн зэвсэгтэй улсууд гэвэл энэ гурвыг л хэлнэ. Нөгөөтэйгүүр Ираныг цөмийн зэвсгээр хангах нь АНУ, Израилийн хурцадмал байдлыг улам дэвэргэнэ гэдгийг дээрх гурван улс гурвуулаа мэднэ.

Иран "бэлгэнд авсан" цөмийн зэвсгээ дэлбэллээ гэхэд АНУ гарал үүслийг нь ядах юмгүй олоод мэдчихнэ гэдгийг Адам Лаутер онцлов. Мөн тэр улс нь АНУ-ын дараагийн цохилтын бай болно гэлээ.

ОХУ-д Путины дараа орох эрх мэдэлтэй нэгэн гэгддэг Медведев үргэлж зоримог бөгөөд харгис мэдэгдэл хийдгээрээ алдартай. Энэ удаагийн мэдэгдлийг Украинд тусалдаг барууныхны эсрэг хийж буй нэг төрлийн тоглолт гэж Адам Лаутер таамаглаж байна. Өөрөөр хэлбэл, Медведевийн мэдэгдлийг "Та нар Украинд зэвсэг өгөөд байгаа бил үү? Тэгвэл бид Иранд зэвсэг өгч чадна" гэж тайлж уншиж болох аж.