Монгол Улсын хөгжлийг хурдасгах зорилго бүхий хэмээн гоёчлон тодорхойлдог "Монголын Эдийн Засгийн Форум"-ыг 2010 оноос эхлэн зохион байгуулж байгаа. Энэ жилийн тухайд нийт 12 сэдвийн хүрээнд салбарын төлөөллүүд чуулна. Тэгвэл тус форум өнгөрсөн жилүүдэд ямар үр дүн авчрав, энэ жилийн сэдвийг хэр оновчтой тодорхойлсон талаар Эдийн засагчдын байр суурийг хүргэж байна.

"ЭЗ-ЫН ФОРУМ ЗАСГИЙН ГАЗРЫГ МАГТАН ДУУЛДАГ МАН-ЫН АРГА ХЭМЖЭЭ БОЛЖ ХУВИРСАН "

Эдийн засагч Ч.Отгочулуу:

–Энэ жилийн сэдвүүдтэй танилцаагүй. Ер нь эрх баригч намынхан л ордог хаалттай арга хэмжээ болж хувирсан. Бас эрх мэдэлтнүүд нийлээд төрийн бус байгууллага байгуулж төсвөөс их мөнгө авдаг гэсэн шуугиан гарсан. Энэ бол зохисгүй үйлдэл. Анх энэ форумыг Ерөнхийлөнч асан Ц.Элбэгдоржийн үед зохион байгуулж байсан. Эрнандо де Сото гуайг урьж авчирч капиталын нууцыг яриулж байсан. Дараа нь шилдэг эдийн засагчид цуглаж, сууж байгаад Шилэн данс, Ирээдүйн өв сан гэх зэрэг бодлогын маш том реформын шинжтэй яриаг олон талуудын хооронд мэтгэлцээн өрнүүлж, хэлэлцүүлдэг байсан. Гэвч сүүлийн жилүүдэд Засгийн газрыг магтан дуулдаг Ардын намын арга хэмжээ болж хувирсан. Иймээс оролцохгүй бас сонирхохгүй ер нь ач холбогдол өгөхгүй.

"ЖИЛ БҮР ҮР АШИГГҮЙ УУЛЗАЛТ ЗОХИОН БАЙГУУЛЖ БАЙГАА НЬ ХАРАМСАЛТАЙ БАЙНА"

Эдийн засагч Ч.Сосорбарам:

-Тус форумыг сүүлийн жилүүдэд тасралтгүй зохион байгуулж байгаа. Монгол Улсад орж ирж байгаа гадаадын хөрөнгө оруулалт, амжилттай хэрэгжиж байгаа томоохон төсөл хөтөлбөрүүдээр үүний үр дүнг хэмжиж болно. Гэтэл өнөөдрийн байдлаар үр дүнг тодорхойлох төсөл, хөтөлбөрүүд хараахан хэрэгжээгүй байна. Хамгийн гол нь Монгол Улсад хөрөнгө оруулалт татах, түүний үр өгөөжийг хүртэх асуудал байгаа. Үүний тулд Монгол Улсад гадаадын хөрөнгө оруулалт татах эрх зүйн байдлыг тодорхой болгох ёстой. Гадаадын хөрөнгө оруулалтын тухай хуулиа тодорхой болгох хэрэгтэй. Хий дэмий хурал, зөвлөгөөн зохион байгуулах нь үр дүнгүй, хоосон зардал болж байна.

Нэмээд дурдахад, гадаадын хөрөнгө оруулалт татах гэж байгаа бол дэд бүтцийн асуудлууд дээрээ анхаарах хэрэгтэй. Эдгээр төслүүдээ хэрхэн зөв зохистой эрэмбэлэх зэрэг бодлогын асуудлуудаа шийдэх хэрэгтэй. Үүнийгээ зөв зохистой тодорхойлоогүй байж жил бүр үр ашиггүй уулзалт зохион байгуулж байгаа нь харамсалтай байна.

Бидний хийх ёстой хамгийн чухал алхам бол дээр дурдсан Гадаадын хөрөнгө оруулалтын тухай хуулиа эргэн харах ёстой. Түүнчлэн татварын орчныг нь хэрхэн сайжруулах талаар арга хэмжээ авахгүй бол зүгээр Монгол Улсад ирээд хөрөнгө оруулаач ээ гэдэг байдлаар хандаж болохгүй. Түүнчлэн орж ирсэн хөрөнгө оруулалтыг улс давуу байдлаар булааж авдаг гэх мэт тогтолцооны асуудлуудаа илүү тодорхой болгох шаардлагатай байна. Эдгээр асуудлыг шийдэхгүйгээр Монгол Улсад гадаадын хөрөнгө оруулалт орж ирэх боломжгүй.

Эдийн Засгийн хямралтай холбоотойгоор Засгийн газар уур уурхайн томоохон төслүүдээ хөдөлгөх хэрэгтэй. Алтны үнэ өндөр байгаа дээр арилжих процессоо хурдасгах, ашигтай төслүүдээ зөв эрэмбэлж гадаадын хөрөнгө оруулалтаа нэмэгдүүлэх хэрэгтэй.

2025 оны Эдийн засгийн форумаар хэлэлцэх асуудал:

• Хөдөөгийн хөгжил ба хоршоо, Эрчимжсэн мал аж ахуй
• Бүсчилсэн татвар болон хөрөнгө оруулалтын бодлого
• Тээврийн дэд бүтэц ба бүс нутгийн хөгжил
• Хотын хөгжил ба ухаалаг хот
• Аялал жуулчлалын боломж ба сорилт
• Уул уурхай болон газрын ховор элемент – Өнөөгийн нөхцөл байдал
• Уур амьсгалын хөрөнгө оруулалт
• Хөрөнгө санхүүгийн зах зээл, хөрөнгө оруулалтын боломж
• Дижитал засаглал ба дижитал эдийн засаг – Гаргасан ахиц
• Чөлөөт худалдааны хэлэлцээр, эдийн засгийн корридор
• Төрийн өмчит компанийн шинэчлэл, Үндэсний баялгийн сангийн үүрэг
• Эрсдэлийн менежмент – Бидний авсан сургамж гэх мэт сэдвийн хүрээнд зохион байгуулагдана.