Нийслэл Улаанбаатар хотын иргэдийн өдөр “Хүрээ цам-Даншиг наадам 2025” энэ амралтын өдрүүдэд буюу зургадугаар сарын 28, 29-ний өдрүүдэд болно. Тус наадмын зохион байгуулалтын талаар холбогдох албаныхан өнөөдөр /2025.06.23/мэдээлэл өгөв.

 -НИЙСЛЭЛИЙН АЯЛАЛ ЖУУЛЧЛАЛЫН ГАЗРЫН ДАРГА Д.БАТСҮХ:

-Анх 1639 онд Өндөргэгээн Занабазарыг Монгол төрийн шашны тэргүүн анхдугаар Богд Жавзандамба хутагтын ширээнд залсан үеэс Даншиг наадмыг хийж эхэлсэн түүхтэй. Нийслэлийн иргэдийн өдрийг жил бүрийн аравдугаар сарын эхээр тэмдэглэн өнгөрүүлдэг байсан. Хүрээ цам-Даншиг наадамтай хамт тэмдэглэхээр болж байна.  Зургадугаар сарын 27-ны өдөр Богдхан, Чингэлтэй, Баянзүрх, Сонгинохайрхан дөрвөн хайрхан уулаа тахина. Энэ үеэр нийслэлийн хэмжээнд үйл ажиллагаа явуулдаг сүм хийдүүд шашин, номын үйл ажиллагаа зохион байгуулна. "Хүрээ цам-Даншиг" наадам нь  Монголын соёл, зан заншлын  уламжлалт хэв шинжийг агуулсан өвөрмөц онцлогтой бөгөөд жуулчдыг татах томоохон арга хэмжээнүүдийн нэг юм.

Тус наадмыг Нийслэлийн Засаг даргын тамгын газар, Нийслэлийн аялал жуулчлалын газар болон бурхан шашинтны төв Гандантэгчинлэн хийдтэй хамтран зохион байгуулж байна. Энэ үеэр Монголын ард түмнийг ивээгч Очирваань бурханы тахилга, Их эзэн Чингис хааны тахилга, Балин тосон урлалын тэмцээн, унзад голч лам нарийн тэмцээн, номын мэтгэлцээн, 256 бөхийн барилдаан, зургаан насны хурдан морьдын уралдаан, үндэсний сур харвааны тэмцээн, үндэсний шагайн харвааны тэмцээн, морьт харвааны тэмцээн, сээр шалгах тэмцээн, есөн дүүргийн ардын авьяастнуудын тоглолт, Монгол туургатны уран бүтээлчдийн тоглолт, иргэдийн хүрээ цам наадам урлагийн тоглолт болно. Мөн Улаанбаатар хотын түүхийг өгүүлсэн гэрэл зургийн үзэсгэлэн, жижиг дунд бизнес эрхлэгчдийн үзэсгэлэн худалдаа, үндэсний хувцасны үзүүлбэр зэрэг үйл ажиллагаанууд болно.

Мөн хамгийн гол арга хэмжээний онцлог бол Хүрээ цам харайх энэ ёслолын арга хэмжээ зохион байгуулагдана. Энэ үеэр мөн 07:00-23:00 цагийн хооронд хоёр чиглэлд нийтийн тээвэр зорчихоор бэлтгэл ажлыг хангаад байна. Нэг маршрут маань Төв цэнгэлдэх хүрээлэнгээс хүй долоо худаг, дараагийн маршрут бол Боловсролын их сургуулиас хүй долоо худаг гэсэн чиглэлд нийтийн тээврийн автобус 18-20 минутын давтамжтай иргэдэд үйлчилнэ" гэв.

Энэ үеэр худалдаа, үйлчилгээний талбайг найман секторт хувааж, 120 цэгт үйл ажиллагаа явуулна. Ил задгай, зөвшөөрөлгүй худалдааг хориглоно. Тодруулбал, “Хүрээ цам – Даншиг наадам 2025” соёлын урлагийн талбай болон худалдаа, үйлчилгээний талбай гэсэн 2 үндсэн хэсэгтэй. Худалдаа, үйлчилгээ талбайн 120 цэгт иргэд болон ААН-үүд зөвшөөрлийн дагуу хоол худалдааны үйлчилгээ үзүүлэх бөгөөд Монгол гэр болон Фүүд тракаар үйлчилгээгээ явуулна. Найман хэсэгт дараах чиглэлээр үйл ажиллагаа явуулахаар аж.

• A, H секторт есөн дүүргийн соёлын болон хүндэтгэлийн гэр, бэлтгэлийн гэр, асар,

• B секторт хүнсний үйлдвэрийн үзэсгэлэн худалдаа, мэргэжлийн холбоод,

• С, D секторт худалдаа, хоол үйлдвэрлэл,

• E секторт фүүд трак буюу явуулын хоолны машин,

• F, G секторт хүүхдийн хөдөлгөөнт тоглоом, хүүхэд хуурайлах өрөө байх юм.