АНУ-ын арми Ираны Фордо, Натанз, Исфахан дахь цөмийн байгууламжид зургадугаар сарын 22-нд цохилт өгсөн. Трамп нэгэнт үйлдэл хийж эхэлсэн тул Тегераны хүчин зөрүүлээд АНУ-ын бүс нутаг дахь цэргийн ангиуд руу халдаж магадгүй гэж шинжээчид таамаглаж байна.

Тэрбээр цахим хуудсандаа "Дэглэмийг өөрчлөх гэдэг үгийг ашиглах нь улс төрийн хувьд оновчтой биш. Гэхдээ Ираны одоогийн дэглэм Ираныг дахин агуу болгож чадахгүй байгаа бол дэглэмийг өөрчилж яагаад болохгүй гэж?" гэжээ.

Гэвч Трампийн энэ үг Батлан хамгаалахын сайд Пит Хегсет, дэд ерөнхийлөгч Ж.Д.Вэнс нарын санаатай зөрчилдөв. Тодруулбал, Пит Хегсэт "Энэ ажиллагаа нь дэглэмийг өөрчлөх зорилгогүй" гэсэн бол Вэнс "Юун түрүүнд бид дэглэмийг өөрчлөх зорилгогүй. Бид Ираны цөмийн хөтөлбөрийг л төгсгөхийг хүсч байгаа" гэжээ.

АНУ-аас Иранд цохилт өгсөн учир дэлхий даяар тархан суугаа америкчуудыг анхаарал сэрэмжтэй байхыг Төрийн департментаас сануулжээ. Хилийн чанадад АНУ-ын иргэд болон ашиг сонирхлын эсрэг жагсаал цуглаан өрнөж магадгүй гэж үзэж байна.

Орос, Хятад, Пакистан улсууд Ням гаригт НҮБ-ын Аюулгүйн Зөвлөлийн 15 гишүүнээс Ойрхи Дорнодод нэн даруй, болзолгүйгээр гал зогсоох тогтоол батлахыг хүссэн байна.

НҮБ-ын хуралдааны үеэр олон улсын төлөөлөгчид АНУ-ын халдлагыг хэрхэн дүгнэсэн бэ?

НҮБ дахь Израилийн төлөөлөгч Дэнни Дэннон "Трамп Иран руу довтолсонд дэлхий дахин талархах ёстой" гэжээ. Тэрбээр хэлэлцээг жүжиг болгон хувиргасан гэж Ираныг буруутгаж буй. Харин Ираны төлөөлөгч Амир Саеид Иравани АНУ-ыг түрэмгийллийг буруушааж, Вашингтон учир дутагдалтай шалтгаанаар халдлага үйлдсэн гэжээ. Хятадын төлөөлөгч Фү Кон "Бээжин АНУ-ын халдлагыг эрс буруушааж байна" гэсэн бол ОХУ-ын төлөөлөгч Василий Небензя "АНУ Пандорагийн хайрцгийг нээлээ. Тэд дипломат арга барилыг хүсэхгүй байгаа нь тодорхой байна" гэсэн юм.