Улс орон даяар Боловсролын үнэлгээний төвөөс зургадугаар сарын 18-21-ний өдрүүдэд Элсэлтийн ерөнхий шалгалт/ЭЕШ/-ыг зохион байгууллаа. Гэвч шалгалтад ирсэн даалгавар нь сургалтын хөтөлбөрт байхгүй байсны зэрэгцээ харандаа байгаагүй, баллуур нь хүрэлцээгүй зэрэг олон бухимдлыг дагуулж эхэллээ.

Тухайлбал, англи хэлний шалгалтад “Унтаагаараа хооллодог эмгэг өвчний талаар бичнэ үү”, математикийн шалгалтад “Хувь тэнцүүлсэн тэтгэврийг яаж бодох вэ” гэхчлэн даалгавар ирсэн.

Даалгавруудаа зөв гүйцэтгэсэн ч машин нь гурван янзаар өөр дүгнэсэн зэрэг маш олон асуудлыг дагуулж байгаа юм.

Гэвч энэ асуудалд ЭЕШ-ыг зохион байгуулсан Боловсролын үнэлгээний төв, мөн Боловсролын сайд П.Наранбаяр нар өнөөдрийг хүртэл тайлбар хийгээгүй байна.

Багш, сурагчид, эцэг эхчүүдийн зүгээс ЭЕШ-ын агуулга хүндэдсэний зэрэгцээ арванхоёр жилийн сургалтын хөтөлбөрт багтаагүй хичээлээр шалгалт авсан нь багш, сурагчдын олон жилийн хөдөлмөрийг үгүй хийж, олон залуусын амьдралаар тоглолоо гэж байр сууриа илэрхийлж эхэлсэн. Уг нь Боловсролын сайд П.Наранбаяр ЭЕШ эхлэхээс нэг сарын өмнө "Математикийн 1000 бодлого нээлттэй нийтлэгдлээ. Энэ удаагийн элсэлтийн шалгалтыг эдгээр нээлттэй 1000 даалгавраас авна" гэж мэдэгдэж байв. Гэвч тэрхүү бодлогоос ирээгүй гэх гомдол ч гарч байгаа юм.

Өмнөх жилүүдэд ЭЕШ-ын даалгавартай холбоотой асуудлаар асуудал үүсвэл тэр даруйд нь тайлбар хийж, агуулгаас гажаагүй гэдгийг тодотгож ирсэн. Харин энэ удаад дээрх будилаанд тайлбар хийхгүй цаг алдаж буйд эцэг, эхчүүд багш нарын хувьд бухимдалтай байна.

Мөн энэ жил ЭЕШ-ыг зохион байгуулж чадаагүй. Шалгалтын материалыг уншсан техник нь гацсан, шалгуулагч цагаасаа хоцорч ирсэн ч шалгалтад оруулсан, гар утастай нь оруулж журам зөрчсөн зэрэг олон алдаа гарсныг сурагчид сануулж байна. Ийм алдаа гарахад улстөржсөн мэргэжлийн бус томилгоо нөлөөлсний зэрэгцээ ЭЕШ-ын даалгаврыг их, дээд сургуулийн багш нараар боловсруулдаг байдлыг халахгүй бол олон зуун хүүхэд хохирох эрсдэл гарсаар байхыг ч сануулах хүн олон байна.

Иймд Боловсролын сайд, Боловсролын үнэлгээний төвийн дарга нар хичээл бүрээр авсан шалгалтын материалууд 12 жилд үзсэн хичээлийнх нь хөтөлбөрөөс давсан эсэхэд тайлбараа хийнэ үү. Тэгэхгүй бол энэ жилийн ЭЕШ-д маш олон хүүхэд хохирогч болсон тухай шуугиж байна. Үнэхээр даалгавар нь 12 жилийн хөтөлбөрөөс давсан бол ЭЕШ-аа ахин зохион байгуулдаг уу, нэг арга хэмжээ авахгүй бол олон зуугаар ганц шалгалтаас болж хохирох ёсгүй.

Энэ жилийн ЭЕШ-ийг 40 мянга гаруй сурагч өгсөн юм.

Г.ХОРОЛ