Дотоод хэргийн их сургуулийн 91 дэх удаагийн төгсөлтийн баярын ёслолын ажиллагаа өнөөдөр (2025.06.21) Сүхбаатарын талбайд боллоо. Үндэсний аюулгүй байдлыг хангах нэр хүндтэй бөгөөд хариуцлагатай албанд хүчин зүтгэхээр цэргийн цолоо гардан авсан төгсөгчдөд Монгол Улсын Ерөнхийлөгч, зэвсэгт хүчний ерөнхий командлагч У.Хүрэлсүх, Монгол Улсын Үндэсний аюулгүй байдлын зөвлөлийн нарийн бичгийн дарга А.Бямбажаргал, Хууль зүй, дотоод хэргийн сайд Л.Мөнхбаатар нар баяр хүргэж, амжилт хүслээ.

Мөн ёслолын ажиллагаанд Хууль зүй, дотоод хэргийн яамны газар, албадын дарга нар харьяа агентлагуудын удирдлагууд оролцлоо. Хууль зүй, дотоод хэргийн сайд Л.Мөнхбаатар Сүхбаатарын, Цэргийн гавьяаны улаан тугийн болон Байлдааны гавьяаны одонт Дотоод хэргийн их сургуулийн 2024-2025 оны шилдэг төгсөгчдөд цол, энгэрийн тэмдэг, диплом гардуулж, ажлын амжилт хүслээ. Тэрээр “Гэмт хэрэгтэй тэмцэх, хилийн аюулгүй байдлыг хангах, авран хамгаалах, шүүхийн шийдвэр гүйцэтгэх, шинжлэн магадлах ажлын эрдэм ухаанд суралцахад цэл залуу нас, бие сэтгэл, сонсогч ахуй үеэ зориулсан Дотоод хэргийн их сургуулийн төгсөгчид та бүхэн Эрдэм мэдлэгийн эзэн, эх орны хүү, охин болон төлөвшиж, төрийн тусгай албанд хүчин зүтгэх хүсэл тэмүүлэл дүүрэн байгааг харахад нэн бахархалтай байна” гэдгээ илэрхийлсэн юм. Дотоод хэргийн их сургуулийн 2024-2025 оны хичээлийн жилд Удирдлагын академийг магистрын хөтөлбөрөөр 24, Цагдаагийн сургууль, Хилийн албаны сургууль, Шүүхийн шийдвэр гүйцэтгэлийн албаны сургууль, Онцгой байдлын сургууль, Эрх зүй, нийгмийн ухааны сургууль, Шинжлэн магадлах ухааны сургуулийг бакалаврын 18 хөтөлбөрөөр 530 гаруй сонсогч, суралцагч амжилттай төгсөж байна.

Дотоод хэргийн их сургууль нь 1934 оны Ардын сайд нарын зөвлөлийн тушаалаар Дотоодыг хамгаалах газрын “Хязгаарын ба гүйцэтгэх ажилтан бэлтгэх сургууль нэртэйгээр үүсэн байгуулагдаж өдгөө, Удирдлагын академи, Цагдаагийн, Хилийн албаны, Онцгой байдлын, Шүүхийн шийдвэр гүйцэтгэлийн албаны зэрэг бүрэлдэхүүн болон харьяа 11 сургууль, мэргэжлийн боловсролоос эхлээд докторын шаталсан сургалт хүртлэх 50 хөтөлбөр хэрэгжүүлж байна. Дотоод хэргийн их сургууль, хамтын ажиллагааныхаа хүрээнд АНУ, ХБНГУ, ОХУ, БНХАУ, БНСУ, Энэтхэг, Турк, Вьетнам, Казакстан, Тайланд зэрэг 10 гаруй орны 30 гаруй ижил төрлийн мэргэжлийн их дээд сургууль, сургалт сурталчилгааны байгууллагуудтай хамтран ажиллаж олон улсын түвшинд ажиллах боловсон хүчнийг дотоод хэргийн салбартаа бэлтгэж байна.