АНУ-д үргэлжилж буй Остин Мэйжорын хагас шигшээ шатанд өрсөлдөх дөрвөн баг тодорлоо. Тэд бол Францын "Vitality", Германы "MOUZ", Бразилын "paiN" болон Монголын "The MongolZ" багууд.

Өнөөдөр/2025.06.21/ шөвгийн наймын сүүлийн тоглолтууд 16 мянган хүний суудалтай Остин хотын "Moody" цэнгэлдэхэд боллоо. "The MongolZ" баг ч энэ шатанд АНУ-д төвтэй, америк тоглогчтой "FaZe Clan"-тай учраа таарч, 2-0 гэсэн харьцаатай хожив. Тоглолтын өмнө аналистууд, тайлбарлагчид, тоглогчдын дийлэнхи нь "FaZe"-ийг хожно гэж таамаглаж байсан. Учир нь тэдэнд "CS"-ийн амьд домог, бүх цаг үеийн шилдэг гэгдэх "s1mple", эзэн орны давуу тал болсон үзэгч, дэмжигчид, америк тоглогч "EliGE", туршлага гээд олон зүйл байсан юм.

Гэхдээ л Монголын багийг дийлсэнгүй. Тоглолтын дараа Б.Аюуш буюу "mzinho" дараах зүйлсийг ярьжээ.

"FaZe"-ийг тайзан дээр үзэгчдийнх нь өмнө хожсон талаар: Мэйжорын тайзан дээр хожил байгуулна гэдэг гайхалтай байлаа. Гэхдээ юуны өмнө бид илүү баг нь байсан юм шүү. Бидний чансааг хар. Миний хувьд энэ бол гайхам үйл явдал биш.

"Valve" болон "HLTV"-ийн чансаагаар "The MongolZ" баг "FaZe"-ээс илүү дээр эрэмблэгдэж байгаа.

Хагас шигшээд Бразилын "paiN" багтай тоглох талаар: Тэд бидэн шиг залуу баг. Сонирхолтой тулаан байх болно. Тэд хувь тоглогчдын чадвараараа сайн. Сонирхолтой тоглолт гарна. Бидний хувьд хүнд тоглолт байх нь гарцаагүй гэж бодож байна.

Финалд шалгарна гэдэгтээ итгэлтэй байгаа талаар: Хэт итгэлтэй биш байгаа. Гэхдээ өөрсдөдөө итгэлтэй байна гэдэг сайн хэрэг. Магадгүй дор хаяж гранд финалд шалгармаар байна. Хагас шигшээд хүрчихлээ. Магадгүй одоо энэ Мэйжорын гранд финалд хүрмээр байна.

Харин хожигдсоныхоо дараа "EliGE" ярихдаа "Бид дор хаяж финалд хүрэх боломж байлаа. Бидэнд амжилт гаргахад хэрэгтэй бүх зүйл байлаа" гэжээ.

Аналистуудын зүгээс "Techno"-г "FaZe"-ийн эсрэг тоглосон шигээ тогтвортой тоглож чадвал тун өөр "The MongolZ"-ийг харах боломжтой гэнэ.