Израилийн дайралт үргэлжилсээр байгаа нөхцөлд цөмийн хөтөлбөрийн талаар хэлэлцэхгүй гэж Иран Баасан гаригт /2025.06.20/ мэдэгдлээ. Тодруулбал, Ираны Гадаад хэргийн сайд Аббас Аракчи "Израилийн түрэмгийлэл зогсох хүртэл АНУ-тай хэлэлцээ хийх боломж байхгүй" гэжээ.

Мөргөлдөөн хурцдахын хэрээр Европ Ираныг хэлэлцээрт оруулахаар ятгаж буй бол АНУ хөндлөнгөөс оролцох эсэхээ шийдээгүй харзнаж байна. Цагаан ордон Пүрэв гаригт мэдэгдэл хийхдээ "Ерөнхийлөгч Трамп Ойрхи Дорнодын мөргөлдөөнд оролцох эсэхээ ирэх 14 хоногт багтааж шийднэ" гэсэн билээ.

Израилийн арми хамгийн сүүлийн үеийн байдлаар Тегеран дахь цөмийн зэвсгийн бүтээн байгуулалттай холбоотой судалгааны байгууллага, пуужин үйлдвэрлэх бааз, баруун болон төв хэсгийн цэргийн байгууламж зэрэг олон арван объектод нэг шөнийн дотор цохилт өгсөн гэж мэдэгдээд байна.

Харин цөмийн хөтөлбөрөө зөвхөн энхийн зорилготой гэж мэдэгддэг Ираны тал Баасан гаригийн үүрээр Израилийн өмнөд хэсгийн Беершеба хот руу пуужин харважээ. Тус халдлагаас хэдхэн цагийн дараа Тель-Авив, Негев, Хайфа хотуудад пуужингийн цохилт өгснийг Израиль мэдээллээ. Сүүлийн цохилтын үеэр 20 орчим пуужин харвасан аж.

Эцэст нь дурдахад, долоо хоногийн хугацаанд Израилийн агаарын довтолгоо 639 хүний ​​аминд хүрсэн бол Ираны цохилтоор 24 хүн амиа алджээ.