Монголын үндэсний их баяр наадам ойртож байгаа энэ үед морь унаач хүүхдүүдийн эрүүл мэнд, амь нас, эрх ашгийг хамгаалах, аюулгүй байдлыг хангах нь чухал. Иймд Хүүхэд, гэр бүл, хамгааллын ерөнхий газраас дараах зөвлөмжийг хүргэж байна.

Хүүхэд хамгааллын тухай хуулийн 27 дугаар зүйлийн 27.5 дахь хэсэгт хурдан морины уралдаан болон морины сунгаа, уралдааны бэлтгэлийн үед уяач нь уралдаанч хүүхдийн эрх, амь нас, эрүүл мэнд, аюулгүй байдлыг хангах үүрэг хүлээсэн байдаг.

Уяач болон эцэг эх, асран хамгаалагчийн анхаарах зүйлс:  

1. Хурдан морины уралдаан болон сунгаа, бэлтгэлийн үед хүүхдийг оролцуулахдаа заавал эмчийн үзлэгт хамруулж, "эрүүл" гэсэн тодорхойлолт авсан байх. Хүүхэд хамгааллын тухай хуулийн 27 дугаар зүйлийн 27.5.5-д "уралдаанч хүүхдийн эрүүл мэндэд хохирол учирсан, амь нас, эрүүл мэндэд хохирол учрах нөхцөл байдал бий болсон тохиолдолд хүүхдийг эрүүл мэндийн тусламж, үйлчилгээнд нэн даруй хамруулах" гэж заасны дагуу аливаа морины ажил, үсэргээ, сунгаан, уралдааны үед хүүхдэд эрүүл мэндэд ямарваа нэгэн хохирол учирсан тохиолдолд нэн даруй эмнэлгийн тусламж дэмжлэг үзүүлэх.
2. Хурдан морины уралдаан болон сунгаа, бэлтгэлийн үед тухайн орон нутгийн онцлог, цаг уурын нөхцөл байдлаас шалтгаалан хүүхдийг зузаан хувцас болон стандартын шаардлага хангасан тусгай зориулалтын хамгаалалтын хувцас, морины хэрэгслээр бүрэн хангах. Мөн аюулгүй байдлыг хангах үүднээс хурдан морины уралдаанч хүүхдийн гэнэтийн ослын даатгалд заавал хамруулах.
3. Хүүхдэд бусад уралдаанч хүүхдийн аюулгүй байдалд саад болохуйц үйлдэл гаргахгүй байхыг анхааруулж, холбооны техник, хэрэгсэл ашиглах, цулбуураас нь татах, шахах, замаас эргэж буцах, шүгэлдэх, морины цавийг ёврон цочоох, тод өнгийн бүс, 1-ээс их ташуур, болон хэт урт ташуур, гялгар уут зэргийг ашиглахгүй байх талаар зөвлөгөө өгөх.
4. Хүүхэд хамгааллын тухай хуулийн 27 дугаар зүйлийн 27.5.6-д уралдаанч хүүхдийг нэг өдөр хоёроос дээш удаа хурдан морь унуулж уралдуулахгүй байх" гэж заасны дагуу уралдаанч хүүхдийг өдөрт хоёроос дээш уралдаанд оролцуулахгүй байх.
5. Морь унах хүсэл, сонирхолтой байгааг эцэг эх, асран хамгаалагч уяач нар лавлаж асуух. Мөн хурдан морины уралдаанд бэлтгэх, оролцох явцад хүүхдийн хичээлийг тасалдуулахгүй, гэрийн даалгавраа хийх, давтлага, дугуйланд явах боломж олгоход онцгойлон анхаарч, сургууль завсардуулахгүй байх.
6. Амин дэмээр баялаг хоол хүнс хэрэглүүлж, өсөлт хөгжлийг дэмжих витамин зэргийг заавал өгөх.