Ерөнхий сайд Г.Занданшатарын Засгийн газрын бүрэолдэхүүн үүрэгт ажилдаа орсон. Тэгвэл Сангийн сайд Б.Жавхлан 2025 оны улсын төсөвт 1.8 их наяд төгрөгийн тодотгол хийх талаар мэдэгдсэн. Энэ оны төсөвт тодотголл хийх асуудалд УИХ-ын гишүүн Ж.Баярмаа ямар байр суурьтай байгааг тодрууллаа. Тэрбээр, “Энэ оны төсөвт тодотгол оруулахдаа 2.3 их наядыг хэмнэх нь хангалтай дүн биш.  Ийм хэмжээний хэмнэлт хийх нь бодит хэмнэлт болж чадахгүй. Энэхүү судалгааг сангийн яамнаас хийсэн. Харин Монголбанкнаас хийсэн судалгаа 3.5 их наяд хавьцаа төсвийн алдагдалд орно гэсэн тооцоолол оны төгсгөлд гаргасан. Зарим эрдэмтэн, судлаачид, эдийн засагчид оны эцэст 5.0 их наядын алдагдалд орох магадлалтай гэж ярьсан. Өөрчлөлт хийе гэж шийдсэн бол 5.0 их наядын хэмнэлт хийх хэрэгтэй. Монгол Улс 2022 онд 22 их наядын төсөвтэй болсон. Улмаар 2024 онд буюу сонгуулийн жил 30 их наяд болгож төсвөө тэлсэн. Харин энэ онд түүхэндээ хамгийн өндөр буюу 35 их наяд төгрөгийн төсөв оруулж ирээд Ерөнхийлөгчийн хоригтой нүүр тулж 33 их наяд болгож бууруулсан. Нэг хоёр жилийн өмнө 20 их наяд, 22 их наядаар болгож ирсэн бол энэ цөвүүн цагт төр өөрөөсөө хэмнэлтээ эхлүүлэх ёстой. Мөн элдэв төрлийн сангийн тоог цөөлөх хэрэгтэй. Засгийн газраас хэрэгжүүлж байгаа 14 мега төслийн эхний гурав нь хамгийн чухал. Богино хугацаанд хэрэгжиж төсөв тасрах үед ашиг өгөх байсан. Урт хугацаандаа аль нь эдийн засагт өгөөжтэй байх талаас харж төлөвлөх ёстой байсан. Одоогоор 14 мега төслийн эрэмбэ алдагдсан байгаа. Тиймээс дахин эргэж харахад хүрээд байна. Хятадын талаас экспорт, импорт худалдан авах нүүрсний хэмжээг 20 хувиар бууруулна гэсэн. Миний хувьд сангийн сайдыг шүүмжилсэн байр суурьтай байгаа. Шинээр бүрэлдсэн УИХ-ын гишүүд үүрэгт ажилдаа ороод жил ч болоогүй. Гэтэл энэ хугацаанд дөрөв дахь удаагаа төсвийн төсөл батлах гэж байна. Эхийнх нь 2024 оны төсөвт тодотгол оруулсан. Тухайн үед төсөвт тодотгол оруулж зарлагыг тэлсэн нь буруудсан.  Үргэлжлүүлэн 2024 оны шинэ төсвийг баталсан. Дараа нь Ерөнхийлөгчийн хоригтой тулж дахин хэлэлцэж баталсан. Гэтэл өнөөдөр дөрөв дахь удаагаа төсөв батлах тухай яригдаж байна. Үүнээс харахад, холбогдох байгууллагууд тооцоо судалгаа муу, эрдэмтэн судлаачдын үгийг сонсохгүй” байна гэж дүгнэж болохоор байна гэж онцолсон юм.

А.ТАМИР