Тэтгэвэр барьцаалсан зээлд тавьсан өр орлогын харьцааг 50:50 болгон сулруулсан ч ахмад настнуудад чангаар бууж байгаа тул зөөлрүүлэх шаардлагатай гэж үзэн өнөөдөр /2025.06.19/ ахмадууд Монголбанк болон Төрийн ордны гадаа суулт зарлалаа.

Монголбанкны Мөнгөний бодлогын зөвлөл энэ сарын 12-нд хуралдаж, тэтгэвэр барьцаалсан зээлийг цалингийн зээлтэй адилтган үзэж, хэрэглээний зээлийн ангилалд шилжүүлсэн болохоо мэдэгдсэн. Ингэхдээ тэтгэвэр барьцаалсан зээлд тавьж буй өр, орлогын харьцааг 50:50 болгосноо зарласан юм.  Энэ нь тэтгэврээ барьцаалж зээл авсан нөхцөлд тэтгэврийнх нь 50 хувь зээлэнд, үлдсэн 50 хувь нь амьжиргааг залгуулахаар үлдэх ёстой.  Гэвч өмнө нь зээл авсан ахмад настнуудын хувьд нэмж зээл авъя гэхэд өмнөх зээлийнхээ үлдэгдлийг дарахаар гарт нь мөнгө үлдэхгүй болох зэрэг нөхцөл үүсч буй аж.

Иймээс тэтгэврийн зээлийг 36 сараар биш юм гэхэд 30 сараар авдаг болох, мөн тэтгэврээ 70-100 хувь барьцаалан зээл авах боломжтой байхаар тэтгэврийн зээлд тавих шалгуур нөхцлийг өөрчлөх ёстой гэж үзэж байна.

Мөн ахмад настнууд авсан тэтгэврийн зээлээ хэнд зарцуулах нь хамаагүй, өөрсдийнхөө хэрэгцээт зүйлд зарцуулдаг. Үр хүүхдүүддээ дарамтлуулаад тэтгэврийн зээлээ тэдэнд зарцуулдаг гэсэн зүйл байхгүй. Бүгд л өөрсөддөө зарцуулдаг. Бидний хувьд тэтгэврийн зээлийг тэглээд өг гэдэг шаардлага тавиагүй, тэтгэвэр нэмээд өг гэдэг шаардлага бас тавиагүй. Гагцхүү ирээдүйдээ ашиглахаар хураалгасан тэтгэврийн зээлээ өтөл насандаа ашиглах боломжийг элдэв саад тотгоргүйгээр олгох ёстой гэж үзэж байна.

Ахмад настнуудыг Төрийн ордны баруун талд суулт зарлах үед нь УИХ-ын дэд дарга Б.Пүрэвдорж гарч ирж санал хүсэлтийг нь сонслоо.

Улмаар Монголбанкны зүгээс энэ асуудлаар ирэх Даваа гаригт мэдээлэл хийхээ мэдэгдсэн. Тэр мэдэгдлийн дараа тэтгэврийн зээлд тавих шалгуур нөхцөл зөөлрөхгүй бол дараагийн арга хэмжээг авч хэрэгжүүлье гэх байр суурь илэрхийлснээр ахмадууд суултаа зогсоов.

Г.ХОРОЛ