Израиль, Ираны мөргөлдөөн долоо дахь өдрөө үргэлжилж байна. Өнөөдөр /2025.06.19/ Израилийн өмнөд хэсгийн Беершеба хотын Сорока эмнэлэг тэргүүтэй хэд хэдэн иргэний дэд бүтэц Ираны пуужингийн цохилтод өртжээ. Эмнэлэг их хэмжээгээр хохирол амссанаас гадна аюултай бодис, материалууд хагарч, гоожиж, алдагдаад байна. Тиймээс иргэдийг эмнэлгийн бүсээс хол байхыг сануулжээ.

Израилийн Гадаад хэргийн дэд сайд Шаррен Хаскел энэ цохилтыг санаатай гэмт хэрэг гэж нэрлэв. Тэрбээр цахим хуудсандаа "Энэ бол цэргийн бааз биш эмнэлэг. Энэ бол Израилийн бүх Негев мужийн эрүүл мэндийн гол төв. Дэлхий нийтээрээ дуугарах ёстой" гэжээ.

Нөгөө талд Ираны цэргийн байнууд ч Израилийн цохилтод өртсөөр байна. Батлан хамгаалах хүчний мэдээлснээр Пүрэв гаригт 20 гаруй байд цохилт өгчээ.

Цохилтод Ираны цөмийн хөтөлбөрийн нэг хэсэг болох Хондаб хүнд усны судалгааны реакторын ойр орчмын газар өртсөн байна. Израилийн Батлан хамгаалах хүчин реакторын ойролцоо оршин суудаг иргэдийг аль болох хурдан аюулгүй газар луу явахыг тушаажээ. Гэхдээ халдлагаас өмнө байгууламжийг тодорхой хэмжээнд нүүлгэн шилжүүлсэн байсан тул цацрагийн аюул байхгүй гэж Ираны "Оюутны мэдээ" агентлаг мэдээлжээ.

Уг реактор нь цөмийн зэвсэг үйлдвэрлэхэд ашигладаг өндөр гарцтай плутони үйлдвэрлэх зориулалттай реактор юм.

"Сайн мэдээ" гэвэл баяжуулах байгууламжуудад цөмийн урвал явагддаггүй учир цохилт өглөө гэхэд Чернобыль эсвэл Фүкүшима шиг гамшиг болохгүй гэдгийг мэргэжилтнүүд хэлжээ.