Хойд Солонгосын эрх баригчид Covid-19-ийн тархалтын талаар худал мэдээлж, иргэдээ эмчилгээ, вакцингүй зөнгөөр нь орхисоныг саяхан гарсан тайланд дурджээ.

Эргэн санавал, тус улс 2022 оны тавдугаар сард Covid-19-ийн анхны тохиолдлыг албан ёсоор зарласан. Дэлхий дахинд цар тахал тархаад даруй хоёр жил өнгөрсөн хойно гэсэн үг. Гэвч гайхалтай нь ердөө гурван сарын дараа Ким Жон Ун 74 хүн нас барсан хохиролтойгоор цар тахлыг даван туулж чадлаа гэж сүр дуулиантайгаар тунхагласан билээ.

Үнэн хэрэгтээ Covid-19-ийн вирус 2020 оноос хойш Хойд Солонгост өргөн цар хүрээтэй тархсан болохыг АНУ-ын Стратеги, олон улсын судалгааны төв болон Жорж В.Бушийн нэрэмжит хүрээлэнгийн мэргэжилтнүүд 100 гэрчтэй ярилцсаны үндсэн дээр тодруулжээ.

Судалгаанд хамрагдсан хүмүүсийн 92 нь 2020 оны тавдугаар сараас 2022 оны гуравдугаар сарын хооронд халдвар авсан, эсвэл хэн нэг танил нь халдвар авсан гэжээ. Тэгэхээр засгийн газар албан ёсоор анхны тохиолдлыг зарлахаас өмнө вирус өргөн хэмжээнд хэдийнэ тархчихсан байсан гэсэн үг.

Тус улс 2020 оны нэгдүгээр сараас 2023 оны наймдугаар сарын хооронд хилээ хааж, бүх гадаад худалдаа, дипломат харилцаа, хүмүүнлэгийн тусламжийг зогсоосон билээ. Энэ хугацаанд дотоодын хорио цээрийн дэглэм маш хатуу байсныг тус тайланд дурдсан байна. Дүрэм зөрчсөн хүмүүсийг цаазлах, хөдөлмөрийн лагерьт албадан хөдөлмөр эрхлүүлэх зэргээр хатуу шийтгэж байжээ.

Өмнөд Солонгосоос хүнсний зүйл хууль бусаар оруулж ирэх гэж байсан хүнийг зургаан сар, амны хаалт зүүгээгүй хүнийг хоёр өдөр тус тус хөдөлмөрийн лагерьт илгээсэн жишээнүүд бий аж. Мөн эмнэлгийн ажилтнууд ариутгалыг зохих ёсоор хийгээгүйнхээ төлөө дайны цагийн хуулиар шийтгүүлсэн тохиолдол ч бий.

Засгийн газар олон улсад анхны тохиолдлоо мэдээлэхээсээ өмнө иргэдтэй гахай шиг л харьцаж байсан гэж гэрчүүд мэдээлжээ. Элит бус гаралтай иргэдэд тухайн хоёр жилийн хугацаанд цар тахлын ямар ч тусламж үйлчилгээгүй үзүүлээгүй гэхэд хилсдэхгүй гэнэ.

Тэрбээр "Манай улсад эрх баригч намтай холбоотой хүмүүсийг л хүн гэж авч хэлэлцдэг. Бусад хүнийг гахайнаас дор авч үздэг" гэсэн юм.

Эмчилгээ, вакцин байхгүй учир иргэд хар зах дээрээс өөрсдөө өндөр үнээр эм худалдаж авахаас өөр аргагүй болдог байжээ. Covid-19-т зориулсан эмчилгээ байтугай энгийн ханиад, халууралт, гүйлгэлтийн эм ч олдохгүй, олдлоо ч хэвийнээс 10 дахин үнэтэй байсан аж. Хар зах дээр зарагдаж буй эмүүд баталгаагүй учир хуурамч эмээс болж өвчин нь хүндэрч, амиа алдсан тохиолдол байгааг нэгэн гэрч ярьжээ.

Өөр нэгэн гэрч ярихдаа "Эрх баригчид цар тахлын үеэр цөмийн зэвсэг хөгжүүлж байсан атлаа хүнсний хомсдолыг тоолгүй хаясан. Хил гарахыг завдаад нас барсан хүн олон. Тэр хүмүүс тэндээ загасны хоол болоод л үлдсэн" гэжээ.

Эрх баригчид цар тахлыг хав даралгүй анхнаас нь үнэн зөв мэдээлж, гадны тусламжийг авсан бол маш олон хүний амийг аврах байсан гэж тэд халаглаж байна.