Гаалийн ерөнхий газраас өнөөдөр /2025.06.18/ гаалийн зарим байцаагчийг Авлигатай тэмцэх газраас шалгасантай холбоотой тайлбар мэдээлэл өглөө.

ГЕГ-ын Зөрчилтэй тэмцэх аюулгүй байдлын газрын дотоод хяналт шалгалтын хэлтсийн дарга Л.ОЧГЭРЭЛ:

-Сүүлийн үед хэвлэл мэдээллийн хэрэгслээр гаалийн байгууллагын албан тушаалтнуудтай холбоотой мэдээллүүд их гарах болсон. Тиймээс гаалийн байгууллагын дотоод хяналт, аюулгүй байдлын хэлтсээс мэдээлэл өгч байна. Сангийн сайдын тушаалаар 2023 онд Гаалийн байгууллагад дотоод хяналтын нэгж бий болсон. Дотоод хяналтын чиг үүрэг нь алба хаагчийн сахилга, ёс зүйн зөрчил, мөн албан хаагчдын хууль ёсны эрх ашгийг хамгаалах үндсэн үүрэгтэйгээр байгуулагдсан байгаа. 2023 онд сахилга, ёс зүйтэй холбоотой нийт 172 албан хаагчийг шалгаж, 49 албан хаагчид сахилгын шийтгэл ногдуулсан. 2024 онд 142 албан хаагчийг шалгаж, 72 албан хаагчид сахилгын шийтгэл ногдуусан.

Мөн 2025 он гарсаар 36 албан хаагчийг шаллгаснаас 15-д хариуцлага тооцоод байна.

Шалгалтын үр дүн яаж харагдаж байна гэхээр өмнө нь сахилга, ёс зүйн зөрчлийн 60 гаруй хувь нь албан тушаалаас хамааралтай, хөрөнгө орлогоо мэдүүлээгүй зэрэг байсан бол одоо ихэнх нь ажил таслалт, ёс зүйтэй холбоотой асуудал болсон.

30 гаруй алба хаагчийг Авлигын эсрэг хуулийн 6.2-т заасны дагуу харьяаллын дагуу АТГ-т шалгуулсан. Үүний нэг нь 2023 оны арваннэгдүгээр сарын 15-нд цахим мэдээллийн хуудаст гарсан гаалийн байгууллагын чинээлэг баячууд гэсэн агуулгатай мэдээлэл. Энэ мэдээллийн дагуу шалгаж, өчигдөр манай хэлтэст хариу ирсэн. Шалгалтын үр дүнгээр шалгагдаж байгаа 13 албан хаагчид авлига, ашиг сонирхлын зөрчил тогтоогдоогүй. Харин гурван албан хаагч мэдүүлэгтээ гэр бүлийн хөрөнгө орлогыг дутуу мэдүүлсэн гэдэг зөрчил илэрсэн байна. Үүнд холбогдох хууль тогтоомжийн дагуу сахилгын шийтгэл ногдуулсан байгаа.