Эдийн засгийн бодлого, өрсөлдөх чадварын судалгааны төвөөс дэлхийн өрсөлдөх чадварын жилийн тайлан, Монгол Улсын 2025 оны өрсөлдөх чадварын үр дүнг өнөөдөр /2025.06.17/танилцууллаа. Монгол Улс 69 орноос 65 дугаарт бичигдсэн байна. 

"Дэлхийн өрсөлдөх чадварын жилийн тайланг 1989 оноос хойш жил бүр танилцуулж иржээ. Улс орнуудын тайланг

• Эдийн засгийн тамир тэнхээ
• Засаглалын үр ашиг
• Бизнесийн байгууллагын ашигт ажиллагаа
• Дэд бүтэц гэсэн үндсэн дөрвөн хүчин зүйл, 20 дэд бүлэг, нийт 335 шалгуур үзүүлэлтээр харьцуулж гаргадаг юм.

Харин Монгол Улс өрсөлдөх чадварын тайланд 2015 оноос хойш өрсөлдөж байгаа. Энэ оны өрсөлдөх чадварын үр дүнгээр Монгол нийт 69 улсаас 65 дугаар байрт эрэмбэлэгдсэн байна. Тодруулбал, Монгол Улс нийт 100 оноо авахаас 40.91 оноо авчээ. Энэ нь өмнөх оноос 5.39 оноогоор буурч дөрвөн байр ухарсан үзүүлэлт болжээ.

Монгол Улс байраар ухрахад, эдийн засгийн тамир тэнхээ, засаглалын үр ашиг, бизнесийн байгууллагын ашигт ажиллагаа, дэд бүтцийн бүх оноо буурсан үзүүлэлттэй гарсан нь нөлөөлсөн байна.

Тухайлбал, өнгөрсөн жил эдийн засгийн тамир тэнхээгээр 42 дугаарт эрэмбэлэгдэж байсан бол энэ жил 55 дугаарт орж, 13 байр ухарчээ. Засаглалын үр ашиг долоон эрэмбээр,  бизнесийн байгууллагын ашигт ажиллагаа гурав, дэд бүтэц хоёр байраар тус тус ухарсан байна.

Өмнөх жилүүдийн судалгаанд Аргентин, Бразил, Перу, Гана зэрэг улсууд Монгол улсын хойно байсан бол энэ жилийн тайланд Монгол улсын урдуур эрэмбэлэгджээ.

Энэ онд өрсөлдөх чадвараар Швейцарь улс нэгдүгээр байрт эрэмбэлэгдсэн байна. Дэд бүтэц, засаглалын үр ашиг нь жагсаалтыг тэргүүлэхэд нөлөөлжээ.  Харин Сингапур, Хонконг, АНЭУ, Нидерланд зэрэг улсууд эхний 10-т эрэмбэлэгдсэн байна.

Энэ онд Монгол Улсад тулгарч болох сорилтуудыг тодорхойлсон байна.  Нэгдүгээрт, уул уурхай болон түүхий эдийн үнийн хэлбэлзэлд хэт өртөмтгий байх, Дотоодын мөнгөний бодлогын тэлэлт болон дэлхийн худалдааны дайнаас үүдэлтэй инфляцын дарамт, Татварын ачаалал болон төрийн хэт оролцооноос болж бизнесийн орчин муудах эрсдэл, Боловсролтой, чадварлаг залуус гадагш дүрвэн, дотоодын зах зээлийн чадварлаг мэргэжилтний хомсдолд орох, уур амьсгалын өөрчлөлт өртөмтгий болох зэрэг асуудлууд тулгарч болзошгүй гэж судалгаанд дурджээ.