Ерөнхий сайд Г.Занданшатар өчигдөр /2025.06.16/ УИХ-д суудалтай ИЗНН, ХҮН нам, Үндэсний эвсэлд Засгийн газарт хамтрах саналаа хүргүүлсэн. Уг саналтай холбогдуулан УИХ-ын гишүүн Ж.Бат-Эрдэнээс тодрууллаа. 

Тэрбээр, "Намын жагсаалтад тодорхой хэмжээний бодлогоор залуучуулын төлөөллийг багтааж, оруулж ирсэн. Тиймээс намын жагсаалтаа буцаад шүүмжлээд байж болохгүй. Нөгөө талдаа эдгээр залуучуудын байр суурийг өөр өнцгөөс харах хэрэгтэй.

МАН-ын бага хурлаас МАН дангаараа Засгийн газраа байгуулна гэдэг шийдвэр гараагүй. Харин алдаа гаргасан нам буюу АН-ыг хамтарсан Засгийн газраас гаргаж шийдвэрлэсэн. Гэхдээ намууд нэгдлээ гээд үүний цаана амаа хумхих ёстой гэсэн асуудал байхгүй. Уг шийдвэрийн дараагаар дахин хамтарсан Засгийн газар байгуулах бололцоо нээлттэй байсан. Тиймээс одоогийн байдлаар УИХ-д суудалтай улс төрийн нам, эвслүүдэд хамтрах хүсэлтээ өгчихсөн байгаа. Шийдвэрийг тухайн намын дарга ганцаараа шийдэхгүй учраас процессын дагуу саналыг хэлэлцэж байх шиг байна.

Намууд дотроо өнөөдөр нэгдсэн шийдвэрт хүрч чадах эсэхийг мэдэхгүй байна. Хэрэв хүрч чадахгүй бол маргаашаас УИХ-ын байнгын хороод хуралдаад явна.

Шинэ Засгийн газрын бүтцийн тухайд кабинетын зарчим алдагдчихаад байна уу гэж харж байна. Ерөнхий сайд нь огцорвол кабинет бүхэлдээ огцордог шүү дээ. Бид шинээр томилогдсон Ерөнхий сайдад маш том эрх өгсөн. Ажил үүргээ бүрэн дүүрэн хэрэгжүүлэх бололцоо олгохын тулд Ерөнхий сайд өөрөө сайд нараа томилох санал оруулж ирэх бололцоо олгосон. Үндсэндээ Засгийн газрын сайд нар Ерөнхий сайдаасаа маш өндөр хамааралтай. Засгийн газар гэдэг бол нэг баг.

Сайн ажилласан зарим сайд нарыг улираан томилохыг үгүйсгэхгүй. Гэхдээ хэн цаашид Засгийн газрын мөрийн хөтөлбөрөө хэрэгжүүлээд явах бололцоотойг Ерөнхий сайд харах байх гэж бодож байна. Ямартай ч Засгийн газрын ажил бусад намын хамтралаар үргэлжлэх ёстой. Харин өмнөх Засгийн газар кабинетаараа хариуцлага хүлээх нь зөв" гэлээ.