Хотын дарга Х.Нямбаатар өнөөдөр цаг үеийн асуудлаар мэдээлэл өглөө. Тэрбээр "Нийслэлчүүдийн баяр наадам буюу "Даншиг наадам"-ын төсөвт өртгийг сайн мэдэхгүй байна. Ер нь Төв цэнгэлдэх хүрээлэнгийн наадмын талбайд тарьмал зүлэг дэвсэх гэхээр морьтой бэлтгэл сургуулилалт хийж, ургаж байгаа зүлгээ байхгүй болгочихдог. Тийм учраас хиймэл зүлэг дэвсэхээс өөр аргагүй. Одоо зүлгээ дэвсээд дууссан. Төв цэнгэлдэх хүрээлэнд 2025 оны зургадугаар сарын 21-нд БНСУ-ын уран бүтээлчдийн тоглолт хийхээр төлөвлөсөн. МҮБХ-ны тэргүүн Ц.Магалжавтай ярилцаад зургадугаар сарын сүүлчээр тухайн үед бороо орвол бөхчүүд бэлтгэл сургуулилалт хийж, хиймэл зүлгэн дээр туршилт хийнэ гэсэн.

Хэрвээ бороо орохгүй бол гал унтраах машинаар зүлгийг норгож, туршиж үзнэ. Төрийн албан хаагчдыг ес орчим хувиар цомхотгож, тодотгол хийхээр байгаа.

Нийслэлийн төсөв улсын төсвийн бүрэлдэхүүн хэсэг. Одоогоор нийслэлийн төсөв тасалдалгүй явж байгаа. Нийслэлээс хэрэгжүүлж буй мега төслүүдийн талаас илүү хувийг төр, хувийн хэвшлийн түншлэлээр явуулж байгаа. Тэгэхээр төсөв дээр тодотгол хийх шаардлагагүй. Харин төсөв дээр баталгааны асуудлаа шийдэх 2-3 төсөл байгаа. Нэгдүгээрт, тойрог замын ТЭЗҮ дууссан бөгөөд байгаль орчинд нөлөөлөх нарийвчилсан үнэлгээг хийж дууссан. Метроных дууссан. Зарим төслүүд дээр холимог байдлаар хэрэгжүүлэхээр гадаадын төлөөлөгчидтэй уулзаж байна. Тойрог зам дээр 15 хувийн эх үүсвэрээ шийдэж, 85 хувьд 10-аас дээш жилийн хугацаатай Экзим банкаас зээл авахад Засгийн газрын баталгаа шаардлагатай байгаа. Баталгааны дүн энэ долоо хоногт эцэслэгдэх байх. Гурван багцаас бүрдэнэ. Тойрог зам ашиглалтад оруулснаар түгжрэл буурна. Эргэн төлөлтийн хувьд 10 хэдэн жилийн хугацаанд Замын сангийн хураамжаар эргэн төлөх тооцооллыг хийсэн. Бид өнгөрсөн жил бурхны авралаар хот хэдэн төгрөг босгож, эрчим хүчний салбарт засварт хөрөнгө оруулалт хийсний хүчинд энэ жилийн арванхоёрдугаар сарын 5-н гэхэд нийт эрчим хүчний суурилагдсан хүчин чадал 350 мВт болж өргөссөн. Бөөрөлжүүтийн цахилгаан станц хугацаандаа ашиглалтад оруулахаар ажиллаж байна. Янз бүрийн осол гарахгүй бол эрчим хүчний тал дээр дутагдалгүй өвөлжинө. Дулааны асуудал хүнд байгаа. Салбарын сайд болон холбогдох албаныхтай уулзахад ДЦС-3 ТӨХК-ийн галын улмаас 9 дүгээр турбины зуух бүрэн шатаагүй учраас тэр зуух дээр технологийн горим өөрчилж, 1500 тонн халуун ус эргүүлэх технологиор явъя. Араас нь турбин гиноратораа захиалж, тендерээ зохион байгуулья гэж ярьсан" гэв.