УИХ дахь Ардчилсан намын бүлэг өнөөдрийн /2025.06.16/ ээлжит хуралдаанаар хэлэлцэн шийдвэрлэсэн асуудлын талаар мэдээлэл хийлээ.

УИХ дахь Ардчилсан намын бүлгийн дэд дарга Б.Жаргалан:

Ардчилсан нам бол хүний эрх, эрх чөлөөг хангах, эдийн засгийн эрх чөлөөг баталгаажуулах хүрээнд тодорхой бодлого шийдвэр гаргаж, ажиллаж ирсэн.

Ерөнхий сайдаар томилогдсон Г.Занданшатар Баасан гаригт Засгийн газрын бүтцээ оруулж ирнэ, Даваа гаригаас төсвийн тодотголыг оруулж ирнэ гэж Пүрэв гаригийн нэгдсэн чуулганд мэдээлэл өгсөн ч одоогоор МАН-ын бүлэг хуралдаагүй, Засгийн газрын шинэ бүтцээ өргөн мэдүүлээгүй байна.

Монгол Улсад тулгамдсан маш олон асуудал байн.  Эрчим хүчний асуудал зэрэг нь хямралын нөхцөл рүү явж байна. Цаг алдалгүй Засгийн газрын бүтэц бүрэлдэхүүнээ УИХ-д өргөн мэдүүлж, бодлогын асуудал дээр яаралтай шийдвэрээ гаргаж ажиллах шаардлага байна. Тийм учраас Ардчилсан намын бүлгээс Ерөнхий сайдад тодорхой шаардлага хүргүүлэхээр боллоо.

Нэгдүгээрт, Монгол Удсын хувьд авлига засаглалын тулгамдсан асуудал болсон. Бүх асуудлын үндэс суурь болж байна. Авлигын эх үндэс болж байгаа зүйл нь эдийн засаг дахь төрийн оролцоо хэт өндөр байгаа явдал байна.

• Шинэ Засгийн газрыг байгуулахдаа яам болон сайд нарыг тоог 50 хувиар бууруулах, төрийн захиргааны болон тусгай албан хаагчдын тоог 20 хувиар бууруулах, төрийн албаны мэргэшсэн тогтвортой байх нөхцлийг хангаж,  ашиг сонирхлын зөрчлийг таслан зогсоох.
• Төрийн өмчит аж ахуй нэгжийг олон нийтийн нээлттэй хувьцаат компани болгох, орон тоог хоёр дахин буруулж, үр өгөөж бүтээмжийг  эрс нэмэгдүүлэх.
• Төрийн хэмнэлтийг хэрэгжүүлэх замаар төрийн хүнд суртал, хяналт шалгалт татварын дарамтаас бизнес эрхлэгчдээ чөлөөлж, хувийн өмч болон хөрөнгө оруулагчдын эрх ашгийг хамгаалах. Хувийн хэвшилд ногдох татварын дарамтыг 20 хувиар бууруулах.
• 2025 онд 20 мянган ажлын байр шинээр бий болгох.
• 2025 оны улсын нэгдсэн төсвийг тодотгож улсын урсгал зардлыг 20 хувиар танах, төсвийн худалдан авалт, хөрөнгө оруулалтын бодлогоо үндэсний аж ахуй нэгжийг дэмжих буюу тендерийг зөвхөн үндэсний компаниудын дунд зарлах.
• Мега төслүүдийг эдийн засгийн үр өгөөжийн хувьд эрэмбэлэн үр өгөөжгүй төслүүдийг хасах.
• Эрчим хүчний хямрал бодитоор нүүрлээд байна.  ДЦС-3-т гарсан ослоос болж 2025-2026 оны өвөл цахилгаан, дулаан хангамж дутагдах эрсдлээс урьдчилан сэргийлж, салбарын реформыг бодитоор хэрэгжүүлэх замаар эрчим хүчний хараат байдлыг бүрэн халах зэрэг бодлогыг УИХ-д оруулж ирэх шаардлагыг бүлгээр хэлэлцлээ гэлээ. Дараа нь сэтгүүлчдийн асуултад хариулт өгөв.

-Ардчилсан намын бүлэг сөрөг хүчин хийнэ, цаашдаа хэрхэн яаж үр дүнтэй ажиллах вэ. Өмнө нь Covid-19 ын төсвөөр сонсгол хийе гэхэд хүчгүйдээд чаддаггүй байсан. Хоёрт, Ардчилсан нам сөрөг хүчин болсноор төрийн өмчит компаниудад томилогдсон бүтээмжийн болон хяналтын менежерүүдийг яах вэ. Ардчилсан намын дарга бол эдгээр менежерүүдийг халах юм бол арьсыг нь өвчинө гэсэн. Мөн УИХ дахь хэд хэдэн Байнгын хорооны дарга нарыг Ардчилсан намын бүлгийн гишүүдээс томилсон байгаа. Эдгээр дарга нарыг буцаан татах уу, яг яах вэ?

УИХ дахь Ардчилсан намын бүлгийн дарга О.Цогтгэрэл:

Ардчилсан намаас томилогдсон албан тушаалтнуудыг яах вэ гэдэг асуудал байнга тавигддаг. Ардчилсан намын хувьд төр цомхон, бүтээмжтэй байх ёстой гэдэг зарчмын байр суурьтай байдаг. Ардчилсан намаас томилогдсон гэж нэрлэгдэж байгаа боловч тухайн албан тушаалтнууд Монголын төрд алба хашиж байгаа болохоос МАН -ын цагаан байранд алба ажил хашаагүй. Төрийн албаны тухай хуулийнхаа дагуу шалгуур шаардлагаа хангаад ажиллах ёстой. Монголын төрд иргэд ногдсон албан үүргээ гүйцэтгэж байгаа.

УИХ дахь Ардчилсан намын бүлэг цөөнх мөртлөө эрх баригч юм шиг хамтарсан Засгийн газрын оролцгочбайдлаар явж ирж байсан, өмнө нь. Одоо бол Ардчилсан нам сөрөг хүчин буюу маш тодорхой улс төрийн байр суурин дээр гарч ирж байгаа.

Өмнө нь бүлэг Covid-19-ийн төсвөөр нээлттэй сонсгол зохион байгуулъя гэхэд гишүүдийн дөрөвний нэгийн санал авч чадахгүйгээс сонсгол зохион байгуулж чаддаггүй байсан. Одоо бол босгод хангалттай хүрнэ.

-Дээр нь Түр хороо, сонсголыг цөөнх нь ахалж, сонсголыг удирдан зохион байгуулах ёстой гэдэг хуулийг батлуулна гэж бодож байгаа. Гэх мэтээр Ардчилсан намын бүлгийн хувьд ард түмний өмнө хүлээсэн үүргээ биелүүлж ажиллана.

Г.ХОРОЛ