Их Британийн гадаад тагнуулын алба "MI6" 116 жилийн түүхэндээ анх удаа эмэгтэй тэргүүнтэй болж байна. Тодруулбал, тус байгууллагад 1999 оноос хойш хүчин зүтгэсэн Блэйс Метревели 18 дахь тэргүүнээр томилогдох болжээ. Одоогийн тэргүүн Ричард Мурын томилгооны хугацаа энэ оны сүүлээр дуусна.

47 настай Блэйс Метревели одоогоор технологи, инноваци хариуцсан хэлтсийн даргаар ажилладаг. Түүний албан тушаалыг "Q" ерөнхий захирал гэж дотооддоо кодлодог. Тэрбээр удирдлагаар томилогдох хүсэлтийг бахархал хүндэтгэлтэйгээр хүлээн авчээ.

Кэмбрижийн их сургуулийг антропологийн чиглэлээр төгссөн Метревели өмнө нь "MI6"-ийн эгч гэж нэрлэгддэг дотоодын аюулгүй байдлын "MI5" агентлагийн захирал байсан. Карьерынхаа ихэнх хугацааг тэрбээр Ойрхи Дорнод болон Европт ажиллаж өнгөрүүлжээ.

Гадаад тагнуулын албаны ажил үүрэг түүхэнд байгаагүй амин чухал болоод буй цаг үед Блэйс Метревели даргаар томилогдох болсныг Их Британийн ерөнхий сайд Кейр Стармер онцлон тэмдэглэлээ.

"MI6" нь терроризм болон дайсагнагч орнуудын үйл ажиллагааг таслан зогсоох, кибер аюулгүй байдлыг бэхжүүлэх үндсэн зорилгын дор Их Британийн аюулгүй байдлыг хариуцдаг, гадаад тагнуулын мэдээлэл цуглуулах үүрэгтэй байгууллага юм. Тус байгууллагын даргыг "C" гэж нэрлэдэг ба тухайн хүн нь олон нийтийн өмнө ил тод нэрлэгдсэн цор ганц гишүүн нь байдаг.