Big Bang хамтлагийн дуучин Тaeyang оролцох "Super Concert"-ийн талаар өнөөдөр /2025.06.16/ мэдээлэл өглөө. Монгол Улс болон Бүгд Найрамдах Солонгос Улс хооронд дипломат харилцаа тогтоосны 35 жилийн ойн хүрээнд дэлхийн хэмжээний, А зэрэглэлийн уран бүтээлч Монгол Улсад  хүрэлцэн ирж байгаа нь хоёр улсын соёлын хамтын ажиллагааны түүхэнд онцгой үйл явдал болж байна.

Тус тоглолт нь зөвхөн хөгжмийн арга хэмжээ бус, хүний нөөцийг чадваржуулах, соёлын солилцоог бэхжүүлэх, олон улсын түвшинд хамтран ажиллах чадамжийг харуулах чухал ач холбогдолтой юм. Монгол Улсын энтертайнмент салбарын уран бүтээлчид, мэргэжилтнүүд дэлхийн түвшний тоглолтыг амжилттай зохион байгуулах чадамжтай гэдгээ харуулахын зэрэгцээ тус салбарын эко системийг бүрдүүлэх, цаашдын хамтын ажиллагааг өргөжүүлэх зорилготойгоор “Super Concert 2025”-ыг зохион байгуулж байгаа аж.

Энэ нь зөвхөн Азийн бус, дэлхийн хэмжээний уран бүтээлчид, продакшн багууд Монголд ирж хамтран ажиллах боломжийг тэлж, соёлын бүтээлч үйлдвэрлэл, аялал жуулчлалын салбарт эерэг нөлөө үзүүлнэ.

“Evandis Entertainment” болон хамтран зохион байгуулагч байгууллагууд дараагийн шатны дэлхийн алдартай уран бүтээлчдийг Монгол Улсад авчрах зорилготой бөгөөд урт хугацааны хөгжлийн алсын хараатайгаар энэхүү төслийг хэрэгжүүлж байна. Соёлын аялал жуулчлалыг дэмжих хүрээнд олон улсын байгууллагуудтай харилцан ойлголцлын санамж бичиг болон хамтын ажиллагааны хэлэлцээрүүдийг эхлүүлж, үйл ажиллагаагаа шат дараатай өргөжүүлж байгаа ба энэ нь бодлогын түвшний дэмжлэгийг зайлшгүй шаардсан стратегийн алхам юм. Түүнчлэн, “Super Concert 2025” тоглолт нь соёлын аялал жуулчлал, үйлчилгээ, худалдаа, медиа, аюулгүй байдал зэрэг олон салбараар дамжин дотоодын нийт бүтээгдэхүүнд (ДНБ) эерэг, олон талт нөлөө үзүүлнэ гэсэн тооцоолол, судалгаанууд гарсан байна.

"Evandis" энтертэйнментээс энэ оны КPOP тэсрэлт болгон зохион байгуулж буй “Super Concert 2025” зургадугаар сарын 21-ний өдөр Төв цэнгэлдэх хүрээлэнд болно. Тасалбарын тухайд хосын, шүтэн бишрэгчийн, энгийн, VIP гэсэн төрөлтэй. Мөн тоглолтын үеэр үзэгчид болон уран бүтээлчдийн аюулгүй байдлыг хангах үүднээс 550 гаруй хамгаалалтын баг ажиллах юм. Зорин ирж буй үзэгчдэд зориулан тоглолтын үеэр баримтлах эерэг уриалга бүхий зөвлөмж гарган ажиллаж байгааг зохион байгуулагчид онцоллоо.